韓國女子團體F(x)前成員雪莉Sulli輕生後，好多人喺悲痛中再度思考、討論有關抑鬱症嘅問題。睇返香港最近嘅社會狀況，市民持續處於情緒好壓抑嘅狀態，唔少人都俾抑鬱困擾住。喺依個狀況下，好多人都想知道，當發現身邊人持續情緒低落、抑鬱嘅人嘅時候，最低限度可以做到啲乜，又有乜唔好做，畢竟有時有啲「安慰」嘅說話對於抑鬱嘅人嚟講，其實係難聽過粗口。
雪莉因網民惡言輕生？面對抑鬱，有時「安慰」係難聽過粗口！
image source:flickr:Quinn Dombrowski
文／偉文
喺10月14日，網上傳出韓國女子團體F(x)前成員雪莉Sulli輕生嘅消息，好多人都感到悲傷、惋惜，亦有唔少人重新思考俾抑鬱困擾嘅人面對緊嘅問題。
有時言語對於一個人嘅傷害可以好大，Sulli長期面對網路上嘅惡言惡語，係會承受好大嘅心理壓力。如果係長期俾抑鬱困擾嘅人，更加係對身邊人嘅言語好敏感，唔止係難聽不堪嘅說話，有時連一啲「安慰」嘅說話都係會傷害到佢哋。
睇返依家香港壓抑嘅氣氛，唔少市民嘅情緒問題日益加劇，但其實好多人唔識點樣去面對、處理依啲情緒。有長期抑鬱嘅網民就話：有時想搵身邊人傾訴，點知佢哋畀嘅feedback仲難聽過粗口，所以成日都係自己搞掂就算。
但當有情緒嘅人都搞唔掂嘅時候，後果係不堪設想㗎！咁應該點做？一齊睇吓由
其實心情唔好，情緒好低落嘅人，係好唔想聽到諸如以下嘅「安慰」：
「唔好唔開心啦！」
「加油啊！」
「個個都係咁㗎啦！」
「過得陣冇事㗎啦！」
「之後會冇事㗎啦！」
「我嗰時咪仲慘過你！」
「諗開啲啦！」
「樂觀啲啦！」
「笑多啲咪得囉！」
依啲咁「樂觀」、「正面」嘅說話係對抑鬱嘅人係冇咩幫助，仲可能係加重佢哋嘅負擔，令到佢哋更加覺得冇人理解佢、幫到佢。其實佢哋唔係想人畀解決方法佢，亦都唔係需要一個老師教佢點樣開心啲，更加唔係想要知道其他人曾經點面對困難，而係需要有一個人可以單純咁聆聽、陪伴。
所以，如果有人向你傾訴嘅時候，要留意三點：
避免使用「怪責」或會產生「內疚感」嘅字眼
只需要耐心聆聽，不需要作出判斷
保留提供個人意見或提供即時嘅解決方法
避免批判及否定佢當刻嘅情緒
千祈唔好令到自己「安慰」嘅說話，令到被情緒困擾嘅人再受到深一層嘅傷害，導致無法挽回嘅結果。
●生命誠可貴，勇敢求助並非弱者，退一步想，可為生命找到出路。
求助熱線：
撒瑪利亞會：2896-0000 （24小時熱線）
香港撒瑪利亞防止自殺會：2389-2222（24小時熱線）
生命熱線 ： 2382-0000（24小時熱線）、2382-0881（長者熱線）、2382 0777（青少年專線）
傾訴平台：
OPEN噏：https://www.openup.hk/
延伸閱讀►►►
做自己有罪嗎？f(x)前團員雪莉激凸「只想舒服點」 被辱罵重度抑鬱：沒人理解我