一遇到反送中就被K.O?香港十大同反送中撞期嘅大事!

一遇到反送中就被K.O?香港十大同反送中撞期嘅大事!

香港每年都有好多固定嘅盛事,而今年居然一拍埋去反送中到就被K.O咗!一張圖話你知討論度差幾多!

2019/08/28

點都突圍唔到嘅香港年度大事?

6月8號到依家反送中期間其實有好多以往大家都會關注嘅年度大事,而呢啲年度大事都仲有好多人討論,但一拍埋落反送中呢個話題之後,就一秒K.O咗!今日DailyView就用網路大數據調查咗十大被反送中蓋過嘅香港大事,一齊嚟睇吓啦!


DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

香港大事

image source:《KEYPO大數據關鍵引擎》(分析期間:2019/06/08-2019/08/27)

10 端午龍舟競賽(418筆)

端午節必備節目當然係喺屋企食住糉睇龍舟啦,唔知有幾多人會為睇龍舟出街,不過肯定一定無反送中遊行咁多。今年端午節嘅時候正係反送中運動醞釀期,比起宜家普遍上氣氛平和好多,之後6月9號民陣遊行有超過100萬人上街,大家就知道呢一次示威絕對唔係咁簡單,但都應該估唔到到今日,會發展到宜家呢個地步。

9 海洋公園夏水禮(2879筆)

暑假係唔少學生全年最期待嘅幾個月,不過今年暑假好多學生都忙住上街,覺都無得訓,夏水禮係每年暑天重頭戲,但今年學生出街唔係去玩,竟然係面對一次又一次嘅催淚彈。夏水禮期間都發生過光復上水示威活動,好多網友都話,欠咗佢地一個暑假,但呢個暑假相信都會係佢地人生,關於自由、公義好重要嘅一課。

8 香港動漫電玩節(4697筆)

7月26-30號嘅動漫節接二連三撞正好多示威行動,包括26號「和你飛」機場集會,27號元朗遊行、28港島區衝突、30號葵涌衝突,無疑一定有打擊唔少動漫迷,唔少網友甚至放低本身熱愛嘅動漫,希望走上街支持一班示威者。有示威者喺動漫節期間入咗會展開遮,大叫口號,之後仲有去金紫荊廣場聚集,快閃寫低「光復香港,時代革命」。

7 香港電腦通訊節(10875筆)

自從反送中運動開始,香港人每個禮拜六日都好忙。8月23-26號嘅電腦節,中間夾住兩個示威:8月24號觀塘區遊行同8.25荃葵青遊行,本身人流應該最旺嗰兩日假期,大家都去參加遊行,入場人數就一定有影響啦。政府就話示威活動影響香港經濟,不過根據主辦單位講,人流雖然比上年下跌大概20%,但入場人士都有消費力,加上唔少廠商選擇減價促銷,其實營業額同舊年持平,都差不多有3億咁多。

image source:香港旅遊發展局
6 香港美食博覽(19012筆)

邊個可以抵抗美食呢,美食博覽除咗掃平貨,就算淨係去試食都一樣咁滿足。今年喺8月15-19號舉辦嘅美食節開幕前,11號晚發生一個少女被射傷眼嘅事件,全港市民都十分激動。12、13號有警察還眼集會,而8月17就有光復紅土行動,8月18號針對警察濫暴行為嘅流水式集會民陣更宣布有超過170萬參加,真係幾多一蚊鮑魚都吸引唔到咁多人。以前大家就笑美食展阿嬸嗰句「你個嘢壞咗呀」,估唔到今日咁多香港人笑都笑唔出,就係因為呢個逃犯條例。

image source:香港旅遊發展局
5 升學放榜(25311筆)

今次反送中藍絲開口埋口就鬧示威者都係廢青,話一班學生讀唔好書反而搞亂香港,而其實佢地只係係想爭取自己未來,以都係香港嘅未來。DSE對學生嚟講絕對係人生好重要嘅一關,今年放榜前一日7月9號,特首出嚟宣佈《逃犯條例》壽終正寢。第二日放榜,記者訪問一班狀元嘅內容都少不免問到點睇反送中。嗱,今次唔係廢青喇。

image source:Youtube/Gordon Yeung
4 歌手演唱會(30977筆)

天后容祖兒一連開18場紅館演唱會,第一日就撞正「三罷」,示威活動呼籲市民罷課、罷市、罷工,當日交通、航班受到影響,甚至有海外Fans嚟唔到現場。最後演唱會因為技術問題遲遲未開始,等待過程中仲有Fans高舉反送中標語,大叫「光復香港」,「時代革命」等標語。最後原定8:15開場,到9:15先正式開始,祖兒照唱,不過都話幫咁多位觀眾退票,果然好錫Fans。

image source:Facebook/容祖兒
3 中秋月餅潮(32137筆)

年年去到呢個時候,周街都係月餅廣告,大家都傾緊幾時要去排隊買流心蛋黃月餅?今年邊間月餅最值得食?不過今年中秋前夕反送中運動仍然進行得如火如荼,大家討論月餅嘅原因都變咗係要罷食邊個撐送中、撐警察嘅品牌出嘅月餅。中秋呢個人月兩團圓嘅節日,相信都會勾起大家對呢個運動入面咁多位已犧牲義士嘅回憶。


2 香港小姐競選(44924筆)

雖然近年港姐競選重點都落咗喺嚟面試嘅人身上,笑料多過美貌,但換個角度諗,起碼都引起一定討論度呀!2019香港小姐競選首輪面試喺6月24號,咁啱特首18號開完記招,21號又有不合作運動,新聞全部都係反送中,面試港姐嘅消息都無前幾年咁喺網上瘋傳。7月3號係第二輪面試,但喺同日凌晨,第四位烈士麥小姐以死相諫,成為反送中示威行動又一個犧牲者。大局當前,今屆港姐唯有委屈吓啦。

image source:tvb
1 香港書展(55337筆)

一年一度書展嘅書展係好多人一家大細都適合嘅節目,睇下年年塞到郁都郁唔到嘅人潮就知道大家對書展嘅熱情。無論係去買書、去簽書會支持自己鍾意嘅作家,定係純粹想去「行個大運」,暑期必去行程之一,一定包括書展。今年書展開幕前兩日,亦即係7月21號發生震撼全港嘅元朗白衫軍打人事件,可以話完全蓋過書展風頭,全香港市民都關心緊事件入面受傷嘅人同追究警方處理手法,大家集中力放哂係社會問題上,自然無咁多心情睇書啦。

image source:wiki

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年08月27日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『被反送中蓋過嘅年度大事』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

「加入香港網路溫度計Fan Page睇睇網民嘅花生係乜嘢?」>>>

-------------------------------------------------------------------------------

DailyView曰:

你係吃喝玩樂嗰班人定反送中運動嗰班人?



接續看下一篇