政治放兩旁,黃藍為民生:光復屯門公園有咩咁大魔力?

政治放兩旁,黃藍為民生:光復屯門公園有咩咁大魔力?

唔通係真正嘅大和解?

2019/07/05

Images Source: YT/拍拍拍YT/拍拍拍

黃加藍,變綠。

有人話,而家嘅香港社會已經走入撕裂2.0時代,香港人同政府,示威者同警方,藍絲同黃絲,雙方嘅對立都愈嚟愈明顯,水火不容。眾所周知,6月9號起至今嘅「反送中」抗爭事件,各個階層嘅矛盾、衝突愈演愈烈,喺槍林彈雨之間,似乎見唔到兩面極端對立和解嘅可能。但偏偏有一件事呢,係藍絲黃絲喺最近嘅「屯門公園光復行動」,竟然有志一同,齊心協力咁支持呢次事件。事源係網民係網路呼籲,叫大家喺星期六7月6號一齊去屯門公園,整治大媽所發出嘅噪音。呢件唔係咩政治議題之爭,而係日常民生議題,因為咁,大家先會放下成見,共同解決問題。呢件咁難得嘅事,到底大家最多講嘅係咩嘢?今日就等DailyView用網路大數據話你知喇!

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

「屯門公園」喺7月3號忽然多咗好多人討論,到底因咩事無啦啦咁多人講呢?仲要近排香港咁多事發生,大家應該係關注「反送中」、「立法會」、「白色」、「DDoS攻擊」……諸如此類嘅資訊㗎嘛,「屯門公園」何德何能可以喺咁敏感嘅時刻跑出,備受市民關注、搜尋呢?哦!原來就係因為有網民發起咗「光復屯門公園」嘅行動,喺7月6號由屯門新墟遊行至屯門公園,表達長期有中國大媽歌舞表演嘅滋擾問題,提出「光復屯門公園,還我乾淨香港」嘅訴求。行動關乎民生,好多人都拋開對立嘅政治立場,黃藍兩方都積極參與討論,香港人一條心,唔怪得「屯門公園」咁hit啦!

關乎民生,全民討論

 7月6號「光復屯門公園」嘅行動由網民發起,消息好快就散播咗出去,仲愈嚟愈多人討論。好多人一聽又係依D遊行活動,就會覺得又係由「連登」主導,但事實並唔係咁樣喎!睇返關於「光復屯門公園」嘅網路大數據,「LIHKG討論區-時事台」都只係排第3,排喺佢上面嘅有「杜汶澤 喱騷 Chapman To’s late show」嘅Facebook page同埋「香港討論區-香港及世界新聞討論」,睇嚟參與討論嘅網民並不局限於連登仔。睇返網民嘅留言,大家都對於「光復屯門公園」嘅行動好支持,除咗「光復屯門公園,還我乾淨香港」嘅訴求,網民仲好貼心咁提醒大家「預防禽流感,勿摸活家禽」啊!

「光復屯門公園」:五大關鍵話題

問題之源:大媽

——呢種咪叫做中國文化囉

中國大媽已經係世界知名嘅中國文化特色,佢哋熱情,佢哋奔放,最鍾意唱歌跳舞。只要有華人聚集嘅地方,都會見到佢哋飄逸嘅裙帶,都會聽到佢哋悅取嘅歌喉。咁香港呢,早就成為咗大媽嘅表演舞台,以前就喺旺角,旺角禁咗之後就喺公園。正如每一個表演者都有最出名嘅舞台,屯門公園就係佢哋嘅紅館。貼身性感辣舞,港伯狂派利是,相當引人注目,亦都引起咗當地居民嘅不滿,話佢哋係公園嘅問題之源。  

image source:Youtube/拍拍拍
未審先判:暴徒

——藍絲都係暴徒?

網民發起7月6號星期六一齊去光復屯門公園,網上吹雞,講到屯門公園班大媽港伯好似十惡不赦咁,佢哋當然認真嬲嬲豬啦。咁既然未到現場交戰之日,大家嘅戰場都係用文字喺網路上互相指罵,咁一眾大媽港伯就用「暴徒」呢兩個字去形容佢哋,話佢哋會破壞公共場所,拆咗成個屯門公園咁喎。但「暴徒」呢兩隻字通常而家都係人地用嚟形容黃絲嘅,但今次光復行動,好多藍絲喎,咁樣到底又點計呢?  

image source:IG/Bypad36nwOg
滋擾民生:問題

——細路仔都無公園去

大媽係問題之源,但到底唱歌跳舞聽落好似好正常嘅活動,到底真係產生咗咩影響到民生嘅問題呢?我哋不妨睇返屯門公園光復行動嘅四大訴求:「處理噪音滋擾、取締不雅賣唱行乞、重奪公共空間使用權及檢討康文署管理不善」。簡單講,即係佢哋唱歌播音樂嘅聲量長時間都勁嘈,加埋有記者影到佢哋好似有不法嘅色情勾當,令到市民根本用唔到公園,要叫康文署管理吓先得!呢四大問題,真係好民生。  

image source:Youtube/momo baby
香港抗爭:光復

——還我屯門公園

光復呢兩個字,喺香港嘅抗爭史上一早已經好出名,最早可以上追返好耐以前上水出現好多水貨客走私,都係同樣咁影響到當地市民嘅日常生活,當時就有網民喺各大社交媒體發起咗光復上水行動,引起咗唔少風波。又點估得到,光復直到今時今日都仲有人用喎。屯門公園以前係一家大細平時落去玩,文員仔放工行吓,退休老人捉吓棋Hea吓嘅公共休憩空間,而家變咁,唔怪得要光復嘅。  

image source:網路照片翻攝
康文署要識做:執法

——投訴原來無用嘅

如果政府做到嘢,點會有市民勞師動眾咁自發搞屯門公園光復行動?睇返相關報導,原來早喺2003年至今,屯門嘅市民已經不斷向康文署投訴,話佢哋已經無辦法再忍受大媽唱歌嘅噪音喇!但係呢,康文署收到投訴,但又毫無行動,只係識講研究緊,檢討緊,搞到屯門居民認真痛苦。屯門公園執法人員都相當無奈,皆因目前條例難以執法,一定要修改先得,前線人員夾起中間,好慘。  

image source:Youtube/睇多啲

分析說明:

本研究資料由《KEYPO大數據關鍵引擎》提供,分析時間範圍為2019年06月28日至2019年07月04日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『屯門公園』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


「加入香港網路溫度計Fan Page睇睇網民嘅花生係乜嘢?」>>>

-------------------------------------------------------------------------------

DailyView曰:

 「政治放兩旁,黃藍為民生」

接續看下一篇

x

訂閱DailyView網路溫度計(香港版)電子報