片/20萬香港人無歌仔聽!網民點回應陳奕迅演唱會取消?

香港社會治安持續唔穩定,2019年唔少原本排晒日期嘅大型娛樂活動都取消晒!萬聖節酒吧化妝、主題公園哈囉喂、TVB台慶show等等,一係就取消咗,一係就轉換其他形式,負評連連。香港人,唔通咩嘢娛樂都無晒?最受影響嘅,莫過於排咗今年年中至年尾嘅搞演唱會嘅歌手,皆因佢哋好多都決定取消演出,好似陳綺貞、王力宏、張敬軒咁,連埋一眾歌迷都好唔開心。近日,11月21號,又有一位歌手話要取消喇⋯⋯

Image source:FB/陳奕迅 Eason Chan

文/積遜猿

香港又多一位歌手決定取消演唱會,呢位就係香港最受年輕人歡迎嘅E神,陳奕迅喇!陳奕迅嘅《FWD富衛保險 陳奕迅 Fear and Dreams 香港演唱會 19/20》,因「無法預計和保證25場演出期間的觀衆安全和相關交通配套」為由,決定取消喺紅磡香港體育館舉行嘅25場演唱會。呢場演唱會,原本係陳奕迅闊別紅館六年後嘅首個香港大型演唱會,已經連月籌備綵排,咩都Ready晒,可惜都係要取消。唔止主辦單位有損失,連一眾期待已久嘅歌迷都無得聽歌,哇,唔通今次只係得Only Fear no Dreams?

Image source:《KEYPO大數據關鍵引擎》分析期間:2018/10/24-2019/11/22。

根據網路大數據《KEYPO大數據關鍵引擎》圖表可見,如果攞周杰倫同陳奕迅演歌會嘅香港網路討論聲量嚟睇,會睇到兩個高位都係佢哋取消演唱會嘅公告日期。周杰倫演唱會嘅主辦單位咁講「鑑於目前社會環境有未能預測之交通情況下,在顧及觀眾安全作為最大考量的前題」,六場演唱會都要延期演出。

香港人,唔知到邊日先有演唱會可以去!主辦單位喺陳奕迅嘅FB Page聲明咁講:「這決定對我們來說是極為艱難。除了時間、心血、努力和經濟的損失,我們同時承受近二十萬名觀眾和歌手的失望和失落。」原本以為底下會有好多留言嬲嬲豬,又點估得到陳奕迅Fans咁高質,無嬲不特止,仲散發好多正能量。我哋一齊睇睇網民留言講咩喇:

「願榮光歸香港,未來Eason順利開回演唱會!」

「期待Eason未來嘅演唱會,香港人加油!」

「核爆都唔割。希望黎明來到既一日我哋一齊開開心心睇您既演出。」

 

有歌迷網民見到陳奕迅演唱會取消,有感而發咁Post咗E神嘅〈小孩不懂怕〉出嚟,「無謂將好好的家鄉繁華變敗瓦/誰都不想失去家/誰變得孤和寡/風吹雨打/誰也都不想天天驚怕/ 害怕轉間遭轟炸」,話係而家嘅神歌。更加唔好講〈六月飛霜〉,「誰來斗膽講仙丹會斷腸/誰有膽去相信過激立場/人人一把口一百種真相/誰說得漂亮」,社會再不安,陳奕迅嘅歌一直陪住香港人咁話。

仲有網民引用埋陳奕迅首〈今日〉回應,真心Warm!相信E神見到都會好開心,有呢批香港Fans。

「當日熱情燃不盡 

今日熱情仍不盡

就算怎都好 你願我更加願

共跨盡冷及暖甜和酸

才可以算是共存

能共患難才是認真的有緣」


延伸閱讀►►►


片/小島秀夫新作《死亡擱淺》評價兩極?話你知香港網民點睇

片/商品還是藝術:大數據透視港人眼中的Banksy

片/方力申為慈善再戰江湖,狂游45公里險死環生