片/小儀、林泳淘同AGA?爆笑男人EEETV明星3接1

​老一輩嘅人就會喺電視上面睇明星,但係今時今日,後生仔已經唔再定時定候坐喺電視面前,因為有樣嘢更加吸引,呢樣嘢叫做電腦。電腦都唔出奇,最最重要嘅,係互聯網先真。因為有咗聯結全球嘅網路,咩嘢都可以即時放上去社交媒體同大家講,呢種自家經營嘅網路平台,已經遠遠超越咗以前嘅平台。近呢十年,大量嘅網紅、KOL出現,佢哋自己拍片,自己放上網,即時貼地咁吸引咗好多人。香港呢個科技咁發達嘅都市,當然都有好多專業拍片嘅YouTuber喇!

Image source:YouTuber/男人EEETV

文/積遜猿

香港YouTuber好多,要殺出重圍,真心唔簡單嘅。但係由三個男人比利、Smith同李萬璣組成嘅「男人EEETV」,唔賣樣,唔係講飲講食,單靠創意自家製搞笑影片,成為咗近年紅爆全港嘅KOL。有少少年紀嘅朋友可能會問,「ETV」,咪即係教育電視?「男人EEETV」三個拍片,著晒校服做特色,原來唔係想教育觀眾,而係同大家一齊做學生學嘢咁話。佢哋最近搞咗個新系列,叫做「明星3接1」,三條影片都引起好多人討論。

「明星3接1」系列,睇個名都知,即係接明星放工,再同呢位明星互動咁。佢哋第一集接嚟畀大家嘅,係香港知名電台DJ小儀。小儀要接受三位男性嘅噓寒問暖,各自問佢一條問題,包括「咁多拍擋入面最憎邊個」、「50歲以上依然係單身嘅女人,應唔應該減稅」同「俾人接放工嗰陣,想要公主抱定法式濕吻」,句句針住小儀嚟問,內容相當搞笑。最後仲要喺三位男士嘅禮物入面挑選一件,唔知小儀要邊份呢?

「希望小儀快樂!」

「又真係幾好笑,璣仔加油啊!」

「高質, 新節目 !!!」

第二集,係接香港人眼中嘅性感女神,林泳淘,Wingto呀!佢哋第一條問題係:「鍾意食炒魷魚定散水餅?」哇,係咪影射緊林泳淘最近啱啱離開咗TVB呢?第二條問題仲直接,問林泳淘「有冇嬲過TVB,少少都當有」,攞埋部聲稱係測謊機出嚟,真係好得人驚。林泳淘好直接咁講,無認真嬲過喎!最後一條直頭係觀眾福利,話好多人關心林泳淘身材,但佢演技都好好,叫佢演出「跳繩」或者係「大地震」。哇,會唔會太有心機呀?之後三份大禮都各有心思,林泳淘擇比利嘅有咩原因呢?

「依集好正,唔係單因為泳淘carry,你哋本身嘅應對同執生都好熟練氣氛好好。」

「比利今集特別活躍喎!」

「機緣巧合下睇到你哋節目呢一集真係好好笑,加油!」

目前最新一集,「男人EEETV」要接嘅明星,係香港歌手江海迦,藝名AGA。佢哋今次話之前噓寒問暖太衰格,今次要直接分別喺十秒之內取悅明星。 比利先打頭炮,竟然話AGA歌唱即興演出「oh no no no」太負面,只要今晚同佢一齊,就會變成「oh yes yes yes」,真係好不堪!李萬璣出埋菲律賓話,點樣令AGA笑出聲?Smith唱歌都無用,因為最後AGA話三個都唔要!比利喺上次林泳淘俾選中之後,竟然又再次得到AGA垂青,想知點解,一齊去片喇!

「Aga新歌好好聽!」

「原來AGA都有諧星潛質!」

「睇完之後先知咩叫真係好老尷.......」


延伸閱讀►►►


片/2020年十二生肖運程!蘇民峰教你點樣趨吉避凶

片/前新聞女神梁凱寧最新動態?火辣衣著登上大學舞台!

片/法國聖母院後最大悲劇!日本沖繩「首里城」一夜燒毀