香港人最愛日本料理!五大迴轉壽司店食過未?

香港人最愛日本料理!五大迴轉壽司店食過未?

等緊我碟三文魚

2019/11/06

五大迴轉壽司店
日本美食,港人摯愛

香港深受日本文化影響,甚至唔少香港人都視日本為自己嘅家鄉。日本,呢兩個字代表高質,代表美好,難怪每年香港去日本旅遊嘅人,都咁鬼多喇!有唔少香港人,只要有短期假,就算只係得兩三日,都會去日本休息吓。但無論有幾愛日本都好,香港人始終都喺香港生活,邊有得成日享受日本嘅正嘢。正因為咁,日本美食就喺香港大行其道,好似迴轉壽司店,幾乎日日都排晒長龍,個個都去食,喺香港極受歡迎。今日就等DailyView用網路大數據話你知,香港人講得最多嘅五大迴轉壽司店係邊幾間喇!

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments ,數值愈大代表主題項目的討論度愈高。

5 板長寿司(349筆)

——ITACHO

板長寿司,日文名ITACHO,原意係指「總料理長」,即係煮嘢食煮得好勁。喺唔少香港人眼中,板長都代表咗CP值高嘅壽司,而且周不時都會推出新嘅壽司,令好多食客都有正嘢食,好似秋季就有「秋刀魚」限定咁。北海道海域新鮮直送嘅秋刀魚,有刺身、壽司兩種食法,真係令人食指大動。板長寿司每個星期三有會員感謝日,喺11月,仲特別推出逢星期一至星期三會員全日都有8折優惠,認真識做公關喎。好多分店有迴轉壽司,又有得即叫即握,咁貼心嘅服務,難怪咁多香港人鍾意。

4 千両(753筆)

——高檔路線

千両,源自日本關東栃木縣嘅極品迴轉壽司店,雖然係「元氣壽司」旗下嘅連鎖店,不過呢,千両走嘅路線明顯高級好多,不論係食材、裝修,都明顯係香港市面嘅有心食店。千両壽司店成日都會推出限定食材,吸引更多食客,好識做生意。好似近日就推出咗活赤貝同裙邊卷壽司、軍艦,一種食材兩種口味,盡見職人廚藝。千両由8月起仲特別推出咗之前都有做過嘅「豐洲特撰.職人壽司」期間限定餐目,喺日本豐洲直送頂級嘅食材嚟到香港,真係喺香港都直接品嘗到日本食材,同去日本一樣!

3 爭鮮(3339筆)

——台灣品牌

1996年喺台灣創立,而家已經成為台灣迴轉壽司最大嘅品牌,殺入香港之後,亦都深得香港人嘅喜愛!爭鮮,可能係香港最出名嘅迴轉壽司店,火紅嘅程度,真係每個地方都總會見到幾間分店。點解決會咁受香港人歡迎?原因無他嘅,緊係同價錢有關喇。爭鮮均一價8蚊碟,真係價廉物美,8字好意頭,食完一定發。爭鮮貼近民心,仲成日搶先推出時令限定食材,好似冬季將至,佢哋已經推出咗嚴選阿根廷赤蝦、西班牙劍旗魚同廣島牡蠣,款款風味獨具,每盤只要30蚊。咁抵,仲唔嚟食?

2 壽司郎(7756筆)

——日本第一

1984年,日本大阪成立咗第一間壽司郎,自此之後火紅全日本,至今已經成為營業額榜首,每年嘅來客數,仲超過埋日本總人口加埋!喺日本做到咁出色,緊係要喺外地開分店喇。2019年,今年壽司郎仲喺香港開設首間分店,位於九龍彌敦道348號彌敦坊UG 樓。日本咁出名,自然令香港人趨之若鶩,新開至今日日都大排長龍。唔好以為佢哋見咁受歡迎就唔諗點推銷喎,壽司郎喺11月仲推出咗期間限定海鮮食材,最特別嘅係「日本國產牛 x 海膽」,日本牛,聽到個地方名都知係正嘢喇係咪?

1 元氣壽司(9849筆)

——全港最多

元氣壽司,嚟自日本1990年成立壽司店,1995年已經殺入香港,真係香港迴轉壽司嘅老字號。由1995年第一間,到而家全香港已經開設咗超過六十間分店,遍佈港、九、新界,成為咗香港人點都會食過嘅迴轉壽司店。雖然元氣壽司咁出名,但佢哋係呢個行業絕對無放鬆腳步,一直用心為香港食客服務。2019年,元氣以「Live The Genki Life」為主題,展開一系列嘅推廣活動,每日都用壽司同香港人加加油,相當貼心。最近元氣仲推出鮮甜嘅鱈魚天婦羅期間限定,lunch又有新配搭,真心正!

狂食迴轉壽司?五大原因話你知

講完五間香港人最鍾愛嘅迴轉壽司名店,你或者會好奇,點解香港會咁鍾意食迴轉壽司?以下呢五個原因,你就要睇睇喇!到底呢五個原因,同你鍾意食迴轉壽司嘅諗法,有冇咩出入呢?

五大食迴轉壽司原因
5 最啱獨食(118筆)

——難肥

有時候得一個人,可以選擇食嘅嘢認真唔多,好似只係得返堆Fast food咁,食完個人都唔開心喇。不過,其實仲有一樣嘢好啱一個人食,又唔怕驚要同其他人夾枱咁煩。呢一樣嘢,正係迴轉壽司店喇!點解最啱一個獨食?皆因係單丁位,對住條迴轉壽輸送帶,眼前只有美食,唔怕見到人地成雙成對。其實間唔中,自己一個享受美食,唔使理其他人,唔使講嘢,都係開心嘅事。

4 款式選擇多(244筆)

——我要食十碟

好多香港人食嘢,坐低咗睇住個餐牌,好多時都會覺得好辛苦。點解?皆因香港唔少人都患上咗選擇困難症!個心七上八落,想食A,又想食B。咁多好嘢食,樣樣都想叫,但偏偏自己根本食唔晒,個人愈諗愈唔開心。呢樣咪係迴轉壽司吸引香港人嘅原因囉!每碟份量都唔多,每碟款式都完全唔同。只要有心,唔止A同B,食晒二十六個字母都得。老細,我要嚟十碟唔同款嘅!

3 總有一間喺附近(249筆)

——落街就有得食

元氣壽司、壽司郎、爭鮮、千両、板長寿司⋯⋯香港咁多間迴轉壽司,開到周街都係,真係只要喺香港生活,行幾步路就會有一間迴轉壽司係左近。迴轉壽司,就好似香港食物界嘅7-11便利店咁。唔係講少,好似爭鮮咁,就有咗唔少小鋪位只係賣外賣壽司,真係去到行入店內食又得,快快手買返屋止食又得。咁普遍方便就腳,地理位置咁優越,難怪香港人成日去喇。

2 小朋友最愛(282筆)

——哇自己攞就得

點解咁多人鍾情迴轉壽司?皆因兩個字,迴轉囉!迴轉有別於其他食法,你係要自己攞,自己等,你最心愛嘅食物千辛萬苦終於嚟到你嘅眼前。呢個過程入面,你仲要係度諗,係度希望,前面嘅人唔會決定伸手攞咗你想要嘅一碟。迴轉壽司仲可以鬥邊個食得多,小朋友就最愛喇。唔少小朋友都坐唔定,但食迴響轉壽司,見住壽司轉嚟轉去咁有趣,迴轉壽司有得食又有得玩!

1 平價抵食(6365筆)

——CP值爆燈

香港人食嘢一向嘴挑,唔係好食,唔會買,唔抵食嘅,亦都唔會入去。迴轉壽司咁受香港人歡迎,最重要嘅原因,當然係要迴轉壽司夠平價抵食喇。直接少少講,香港人最鍾意比較,要CP值爆燈先會成日食。好多人食迴轉壽司,都係因為香港最出名嘅迴轉壽司店,都係好食、抵食,價廉物美,呢四個字,已經足夠講出香港人鍾情迴轉壽司嘅原因。唔講咁多,即刻去食返次先。

分析說明:

本研究資料由《KEYPO大數據關鍵引擎》提供,分析時間範圍為2018年11月05日至2019年11月04日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『五大港人迴轉壽司店及五大喜愛原因』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論熱度大小,不代表網友正負評價。

「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

我要食生魚片!

接續看下一篇