難得休息唔知做咩好?2019十大Netflix原創劇睇咗未!

難得休息唔知做咩好?2019十大Netflix原創劇睇咗未!

本文微劇透,旨在介紹!

2019/10/16

Netflix dv
原創劇集,Netflix潮流

2016年,萬眾期待嘅網上影視平台Netflix,終於喺香港登場!Netflix嘅出現,可以話完全打破咗香港人睇劇嘅心態,好多人原本睇死Netflix喺香港搞唔起,因為要香港人付費睇嘢根本無可能,連Whatsapp每月8蚊都唔會畀喇。但係呢,Netflix竟然奇蹟咁得到香港大眾支持,每年推出嘅新劇都成為網路熱話,好似《黑鏡》、《怪奇物語》、《漢娜的遺言》等等,都極受香港人歡迎。Netflix高質原創劇集,喺2019年已經成為咗香港人日常必講嘅潮流話題,未睇隨時無話題!想要追上潮流,想要睇睇高質劇?今日就等DailyView同你介紹2019年截至10月14號首播嘅Netflix原創劇集,仲幫你用關係網民討論情況嘅「網民熱度」做十大排行榜,等你睇返幾部,同人哋吹水都多個話題!

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments ,數值愈大代表主題項目的討論度愈高。


10 《從心看我》(127筆)

——正視種族歧視

《從心看我》(When They See Us),真人真事改編,高度還原1989年美國發生嘅強姦案(Central Park Five),有五名黑人被告喺紐約中央公園強姦一名白人女性。但係,呢單案件只係因為佢哋膚色,就認為佢哋犯下罪行,根本係老屈。喺1989年五位黑人首次被檢警偵訊,2002年先改判無罪開釋,再喺 2014 年同紐約市達成和解,歷時20幾年,亦都代表咗佢哋失去咗人生四分一嘅光陰。《從心看我》還原返呢單案嘅真相,五位黑人嘅心路歷程,好有意義,仲喺IMDb取得9分!


9 《人格四重奏》(164筆)

——勾心鬥角女人計

《女孩,四繹》(Persona),一共有四集,每集都係獨立故事,由唔同嘅知名韓星演出,成為呢套刻相當引起香港網民關注嘅原因。呢幾位韓星有邊幾個呢?分別係另一部Netflix劇集《李屍朝鮮》嘅裴斗娜、韓國美少女歌手李知恩IU,同埋做過《偷天對決》嘅朴海秀,咁多靚女,難怪會有咁多香港網民討論佢哋喇!雖然IMDb只係得6.6分,但係呢,只係睇佢哋演出都值喇!呢四集故事各有特色,共同嘅,係講緊女性愛情嘅故事,如果對佢哋,對愛情故仔有興趣,就不妨一睇。

8 《五行刺客》(166筆)

——馮德倫執導

香港呢,就大把勁人,周不時都有有料之人衝出國際。俗語話,古有李小龍,今有馮德倫。無錯,點解《五行刺客》(Wu Assassins)呢部劇集咁多香港人討論?就係因為居然有香港人執導嘅劇集,喺Netflix呢個國際全球影視平台上面登場!《五行刺客》係一部重視武打嘅劇集,背景設喺洛杉磯嘅唐人街,主角係一位積極向上嘅廚師凱(Kai Jin),被選中成為最新亦都係最後一位「天選者」。即係咩?即係要係咁打壞人,直到世界和平為止囉!IMDb得6.5?香港武打加10分喇!

7 《雨傘學院》(229筆)

——漫畫改編英雄劇

《雨傘學院》(The Umbrella Academy),一喺Netflix登場,即時引起香港網民喺各大討論區不斷吹水,成為熱門話題。原因無他嘅,香港人一向鍾意睇英雄劇,尤其係《雨傘學院》嘅設定咁特別,六位主角各有特色、性格同超能力。好似有位識瞬間移動,殺人唔眨眼,又有位只要講出聲,就可以令人哋對佢言聽計從,認真吸引。佢哋唔止打得,仲相當有血有肉,六位角色周不時都有衝突,但係面對大問題,又要互相合作,真係劇力萬鈞。IMDb8分咁高,真係叔叔不行鳥!

6 《超能男孩:萬能媽媽》(278筆)

——非一般英雄劇

如果你對傳統嘅英雄劇集無興趣,咁《超能男孩:萬能媽媽》(Raising Dion),可能就相當啱你嘅口味喇!因為呢部劇集正正係英雄劇之中嘅破格,創意咪就係呢種囉!《超能男孩:萬能媽媽》,睇個名都知,有超能力嘅係男仔,而媽媽呢,雖然佢無超能力,但必須照顧呢位啱啱先有超能力嘅男仔。同時間,佢哋要躲避政府追捕,又要追查出老豆之死嘅原因,到底一切風暴背後嘅真相係咩呢?男仔有超能力,都要有阿媽識得照顧佢先得。IMDb7.1分,單睇創意都吸引觀眾喇。

5 《難,置信》(315筆)

——不受信任嘅受害者

Netflix原創迷你影集《難,置信》(Unbelievable),9月推出無耐,網民已經異口同聲咁一致對呢部劇集好評,IMDb8.6分喇!睇劇名都知,呢部劇集並唔係咩小品溫馨劇,而係講緊社會嘅陰影。《難,置信》描述咗少女瑪麗阿德勒 (Marie Adler) 嘅悲慘故事,佢係一位華盛頓18歲少女,喺2008年報警表示自己被闖入家中嘅入侵者強姦。但係警方、社會都唔信佢,一齊Blame the Victim。呢部劇仲要係真人真事改編,都咪話唔可怕!到底佢有幾慘,又點平反?一齊睇睇就知喇!

4 《李屍朝鮮》(339筆)

——韓國喪屍大戰

如果你鍾情睇喪屍片,可能已經睇哂西方嘅喪屍片,或者會覺得呢類型嘅片真係拍到無咩新意。但係你咁樣諗就錯喇!《李屍朝鮮》(Kingdom),就係用韓國嘅文化、歷史背景,拍出咗IMDb8.3分嘅喪屍片!呢部劇嘅背景唔係現代,而喺16世紀嘅朝鮮王朝,王世子李蒼想見臥病在床10多天嘅父王,但係宮廷中人唔俾佢睇。為咗知道點解,佢微服查訪尋找曾經醫過父王嘅大夫,意外發現原來瘟疫擴散緊整個韓國。呢種瘟疫,會令人死而復活,愛吃人肉,王世子到底可以點做呢?

3 《迷離島》(499筆)

——IMDb4.4分

《迷離島》(The I-Land),聽個名都知,同當年美國熱爆全球嘅劇集《謎》(Lost)相當似。咁《迷離島》呢,又的確係同呢部經典美劇有雷同嘅地方。佢哋都係以一座遠離世界嘅陌生島嶼做背景,不過《迷離島》仲神奇,十位角色係呢個島入面,都係失咗憶,完全唔知自己點解會喺呢個地方。佢哋當然知道事情無咁簡單,為咗要解開謎底,一齊努力喺呢個地方搵到真相。呢種以解謎為主嘅劇集,相當要求觀眾嘅智力,如果自認唔怕解謎,呢套劇集,或者就係你嘅精彩選擇!

2 《性愛自修室》(1088筆)

——青少年要性教育

《性愛自修室》(Sex Education),睇個名都知,係講緊性教育嘅。性教育呢樣嘢,唔好講香港,連外國都無咩真係教得好,但係呢樣嘢偏偏好重要。劇集入面,男主角係一位中學生,佢阿媽就係一位性學專家,由細到大佢都聽咗唔少有用嘅性知識。有一日,佢就同學校入面一位MK妹合作,幫同學做性方面嘅幫手,解決青少年面對嘅性問題。呢種背景,聽落已經好有趣,可以順便學埋正確嘅性知識,睇劇之外,都俾性教育吓。性愛自修室?喺屋企自己睇劇都做到。IMDb8.3分,正!

1 《全祼監督》(1888筆)

——日本AV發展史

全球勁紅嘅日劇《全祼監督》(Naked Director),唔單止要睇山田孝之嘅精采、賣肉演出,更要知道呢部劇入面,反映咗日本色情行業嘅發展史。主角西村透,喺日本係真有其人,呢部劇集,只係真人真事改編,其中嘅大事都忠實歷史。日本色情行業影響全球,就算你自己無睇,你身邊都總有幾個人會留意。點解日本色情行業可以做到咁大?佢哋又係點解一步一步咁變成今時今日咁?呢種問題,就等我哋睇呢部IMDb8分《全祼監督》,跟住山田孝之演出嘅西村透,一齊了解喇!

分析說明:

本研究資料由《KEYPO大數據關鍵引擎》提供,分析時間範圍為2018年10月13日至2019年10月14日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『2019十大Netflix原創劇集』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論熱度大小,不代表網友正負評價。

「加入香港網路溫度計Fan Page正過睇C1啊!」>>>

-----------------------------------------------------------------------------------------------

DailyView曰:

Netflix and chill 

接續看下一篇