咩叫popo同FC?連登十大日常反送中運動嘅「抗爭用語」!

咩叫popo同FC?連登十大日常反送中運動嘅「抗爭用語」!

「手足」,「行完街」就一齊嚟睇下呢篇文啦!

2019/10/02

抗爭
點解有咁多字我都睇唔明嘅?

眨下眼,反送中運動原來已經進行咗就快四個月啦!而呢場運動都可以話係凝聚左唔同地方嘅人喺埋一齊㗎~正當越嚟越多人討論呢個話題嘅時候,唔知你有冇發覺,就會有越嚟越多關於呢場運動嘅「潮語」開始出現呢?哈哈哈,你會唔會都睇到R晒頭呢?好啦,唔使怕自己跟唔上話題進度喎!宜家DailyView就同你一一拆解呢啲「專有名詞」啦!

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments ,數值愈大代表主題項目的討論度愈高。


10. 我都係「行街」姐

嗱!其實此「行街」就不同彼「行街」嘅~反送中運動包含咗好多大大小小嘅遊行示威。正路嚟講,要遊行就要申請,收到不反對通知書先可以出嚟遊行。而721元朗西鐵襲擊事件嘅發生,令到好多人決定喺7月27號出嚟參加「光復元朗」大遊行。不過呢一次警方係唔批不反對通知書,所以7月27號嘅日迫爆元朗嘅市民,全部都聲稱只不過係嚟元朗「行街」!當日元朗有開舖嘅舖頭啲生意都好好𠻹!

image source:Facebook/FOODCHIC
9.「popo」not pooh pooh

有啲人以為「popo」係講緊小熊維尼(Winnie the Pooh),搞錯咗啦!其實反送中運動開始咗冇耐呢個名詞就出現咗㗎啦,而當中仲有一首好Hit嘅rap歌叫做「Fxxk the popo/X狗」,好多人都識唱𠻹!「popo」呢其實係指警察,因為警察嘅英文「police」開頭嘅2個英文字母為「po」。其實除咗呢個原因之外,「popo」發音亦似係「大便」嘅英文名,所以一班認為香港警察濫權而不滿嘅反送中人士就藉此用「popo」嚟形容佢哋啦。

8. 一日手足,一世都係手足

「手足」兩字就好似拍檔,伙伴咁嘅意思。例如你可能聽過地盤叔叔叫佢啲同事做「手足」。所以「手足」呢個字並唔係因反送中運動先新創嘅詞語嚟。而係反送中人士用嚟形容同佢哋有同一政見,又或者係一齊參與反送中運動嘅市民。所以「手足」兩個字喺佢哋同正常人嘅分別,就在於正常情況下大部分嘅人都會叫自己本身認識嘅伙伴做手足,但反送中人士就只要大家有同一理念,無論你識唔識佢,佢都會係你手足!

image source:flickr/Studio Incendo
7.「兄弟爬山」?要爬邊座?

傻豬,人哋唔係真係去爬山呀!反送中運動一直以嚟都強調幾點:不割蓆、不譴責、不分化、不篤灰。而「兄弟爬山」嘅觀念都幾似,主要都係強調大家目標都係一致,無論大家點做都好,都唔會去指責。而「兄弟爬山」仲有下一句㗎,就係「各自努力」。因為呢場反送中運動入面有唔同人分擔唔同角色,例如佢哋嘅勇武派、文宣等。因為大家用唔同手法達成一致目標,所以就叫「兄弟爬山,各自努力」啦!

6. 我要「攬炒」!

你係咪都曾經聽到人哋講過呢句呢!攬炒呢個字喺香港一直以嚟都有人會用,而原來「攬炒」兩個字最早期嘅出處,竟然係嚟自啤牌鋤大弟入邊!不過如果應用喺反送中運動入面嘅話,其實係由一個連登帳號「我要攬炒」hit起嘅~呢位使用者(簡稱巴打)十分厲害,就係佢主動出信幫政府官員等人取消外國護照,加上其後嘅幾次行動發起而受到眾連登仔膜拜。

image source:Instagram/winniemperor
5. 邊個係「毅進仔」?

成日都聽到人哋話咩毅進仔,究竟係講緊邊個?冇錯,佢哋又係講緊警察啦。毅進文憑係最快嘅途徑畀啲市民修讀後拎等同香港中學文憑考試5科合格嘅成續,因而成功投身警察行業。所以自從反送中運動發起,大家就為警察起咗個花名叫做「毅進仔」,嘲笑佢哋學歷唔夠高,同時亦不滿點解某部份學歷較低嘅警察反而可以拎咁高人工同咁多福利𠻹。

image source:stickers.cloud
4. 救命呀!有「鬼」呀!

冷靜啲!雖然就快萬聖節姐,但係反送中運動入面所講嘅「鬼」並唔係嗰啲幽靈呀!佢哋係指內鬼!例如基本上每場反送中運動,大部分出嚟遊行嘅反送中人士都著黑色衫呼應運動。不過呢,佢哋總會發現有啲著黑衫嘅市民行為舉止上比較怪異,比較疑似係內鬼提供現場遊行消息畀警察知。甚至乎傳聞某嘅警察都被揭發著黑衫扮做示威者混入去,所以「鬼」其實係指「內鬼」咁解~

3. 你「FC」咗未?

自從反送中運動開始,每日都會收到唔同嘅資訊。但唔係樣樣都可信㗎嘛!於是反送中人士就會喺資訊上打上「已FC」或者「未FC」。「FC」係取自「fact check」嘅縮寫,中文解為已證實或者未證實咁解。當大家收到mark住「已FC」或者「未FC」嘅資訊時,至少心入面都有個譜,唔洗心思思估信唔信得過!不過,其實有心傳播謠言嘅,都可以老作一段嘢然係打「已FC」嘅...所以最緊要都係你嘅分析能力!

image source:LIHKG
2. 港鐵同「黨鐵」發音又真係幾似喎!

其實721嘅元朗西鐵襲擊事件已經令市民人心惶惶。到咗8月,港鐵更向法庭申請禁制令,8月23號提早關閉葵芳站,同埋喺觀塘地區有示威活動嘅觀塘線某啲車站。雖然港鐵就話設施被惡意破壞,但除咗係示威者覺得被針對之外,普通市民亦唔滿意呢個做法,罔顧咗佢哋日常交通需求。於是佢哋就為港鐵起名叫做「黨鐵」,諷刺佢哋管理方式之餘,仲話緊佢哋嘅列車質素越嚟越唔安全。

1. 「Be water」?我係人類嚟㗎喎!

要你變成水?其實呢句係李小龍金句:「Be water, my friend!」。水可以有各種形態,可以變成冰,可以變成水蒸氣。人要好似水咁,喺唔同嘅時候要做出唔同嘅變化。而喺呢場反送中運動入面,呢句特別係反送中人士經常同前線講嘅一句話。希望可以提醒佢哋唔好一味勇字行頭,大家要齊上齊落一個都不能少。自從7月1號示威者衝擊立法會大樓之後,「be water」呢句經典說話就出現咗喺呢場運動入面。

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年09月30日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『香港抗爭用語』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論熱度大小,不代表網友正負評價。


「加入香港網路溫度計Fan Page睇睇網民嘅花生係乜嘢?」>>>

-------------------------------------------------------------------------------

DailyView曰:

「最潮嘅人仲唔係我?」

接續看下一篇