十大受「反送中」影響嘅職業,你做緊嗰行有冇上榜?

十大受「反送中」影響嘅職業,你做緊嗰行有冇上榜?

「反送中」運動自六月以嚟遍地開花,呢場大型社會運動影響住各行各業,今後香港應該何去何從?

2019/09/23

搵食姐!犯法啊?我想㗎?

有人仔細老婆嫩;有人為口奔馳;亦有人認為宜家係自己人生中嘅收成期,話知個天跌落嚟,總之唔好阻佢搵食。可惜呢個世界就係咁殘酷,當整個社會、政治制度受到前所未有嘅動搖,就算只係想有三餐溫飽,都唔好以為可以置身事外。喺「反送中」運動展開以嚟,唔同行業都受到唔同程度嘅影響,今日DailyView就用網路大數據調查咗十個最受「反送中」運動影響嘅行業,快啲睇下你嗰行有冇份!

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

職
10 航班取消影響影響機務人員 (116筆)

受連場市民「送機」與「接機」活動影響,多班航班取消或延誤,機管局曾經喺8月取消所有航班升降,登記服務亦都暫停。受影響嘅除咗大批旅客之外,仲有一班衝上雲霄嘅機務人員,爲咗復飛,佢地隨時Stand By。之不過呢啲影響都係一時,而嗰班受中國民航局壓力而被逼辭職,同埋嗰啲無故被炒魷魚嘅航空公司職員,對佢地嚟講呢嗰可能係職業生涯上永遠嘅污點。

image source:flickr:Lawrence Wang
9 外資減少,出入口難(118筆)

「香港作為全球貨櫃港口,好多外資公司都將總部設喺香港,同時佢地亦將香港作為進入中國市場嘅門戶......」政府高官經常都將呢啲說話無限loop,話香港好有優勢乜乜乜。事實上,呢幾個月發生嘅公眾活動的確令唔少外資公司憂慮香港前景而減少貨物進出香港,甚至係撤資,直接受影響當然係出入口貿易行業。不過如果將公司總部設喺一個懷疑有官商鄉黑勾結、市民人權保障有疑慮嘅地方,常識題:你制唔制?

image source:wiki
8 機場癱瘓影響貨運(280筆)

機場作為運輸業其中一個重要嘅出入口,係香港嘅命脈之一,所以一直都係示威者表達訴求嘅地方,因為航班升降一旦延誤或取消,機場嘅物流運輸就即刻停晒,做到握實香港咽喉嘅效果。 最終機管局要向法庭申請禁制令,禁止所有係機場範圍內嘅示威活動,並作出人流管制,同時亦造成旅客嘅不便,呢種斬腳趾避沙蟲嘅做法唔通真係work?禁制令可以禁一世咩?

image source:wiki:Mk2010
7 司機冇客收入下降(319筆)

無論係揸的士定係旅遊巴,總之係司機,都一定對近排冷清嘅市況好有感覺。皆因每次有公眾活動,佔據馬路就係指定動作,一塞就起碼數以小時計。結果下次再預告有示威活動,啲客就一定唔會揀地面交通工具。而家旅客少咗,冇人租車啊陰公!不過,喺邊度跌低就邊度企起身,馬路嘅事就馬路解決!所以早前有班旅遊巴司機發起慢駛,希望政府快啲推出紓困措施。

image source:wiki
6 導遊冇團手停口停(371筆)

叫苦連天仲有香港嘅導遊,「反送中」運動嘅持續令大陸唔知係咪驚啲同胞番去有樣學樣,立即叫停所有來港旅行團。由於導遊同遊客係共生關係,冇團黎玩導遊即係冇飯開,而大陸旅行團佔香港外來旅客好大比重,冇咗班豪客既導遊們真係好頹。不過最近廣東省計劃容許香港導遊去珠海橫琴執業,但前提要「愛國愛港」喎。照咁睇,香港導遊就算冇咗大陸團都唔會完蛋嘅......

image source:flickr:houliuken
5 樓市波動地產冇單開(409筆)

連日嚟嘅反修例示威同樣對地產樓市帶嚟衝擊,有幾個經常出現大型公眾活動嘅地區如元朗,數據顯示近期嘅交易量下跌,甚至有業主減價出售務求盡快完成交易。呢場「反送中」運動短期內都睇唔到消退嘅跡象,對樓市影響可能係長期嘅,因為要提升返市場嘅信心亦唔係一朝一夕可以做到嘅事。係呢段社會同市場氣氛都低迷嘅時期,做地產嘅朋友可能要再忍耐吓。

image source:wiki:ZIouhoaja
4 工人冇地盤冇飯開(535筆)

受「反送中」運動影響,工地成為好多示威者「架生庫」,地盤受到唔同程度嘅損失,有啲工地暫停開工。同時因為封路封站,附近嘅地盤亦都關閉,工人冇地盤就等於冇飯開,加上搵食架生又比人攞咗去做抗爭工具,真係手停口停㗎!唔少地盤工友都對示威者行為好不滿,佢地覺得阻人搵食猶如殺人父母,亦有工友覺得好無奈,希望事件盡快平息。

image source:flickr:Kelvin Siow
3 風頭火勢冇人飲飲食食(879筆)

飲食業排到第三位,可想而知「搵食」對香港人好重要,但係由6月開始「反送中」運動蔓延至港九新界,示威者堵路同港警嘅暴力鎮壓,做飲食業嘅朋友就真係欲哭無淚啦。因為啲市民唔係驚食肆唔開,而係怕一出街就食催淚彈同胡椒噴霧,仲有海綿彈同橡膠子彈做甜品,係槍林彈雨情況下,梗係留屋企食杯麵啦!所以好多市民都話,警察唔出嚟就乜事都冇㗎喇!

image source:pixabay:lifeP
2 旅客唔嚟酒店多空房(953筆)

旅遊業係香港經濟支柱之一,酒店數量拍得住7仔。家陣香港咁「亂」,先唔講外國遊客減少咗,最近仲要係零大陸團,唔怪得酒店reception都拍死唔少烏蠅。遊客唔嚟嘅原因為不外乎擔心香港局勢同人身安全,唔少遊客都臨時取消訂房或者押後行程,旅遊業受創令酒店業都受到牽連,有啲酒店更推出減價優惠,希望一遍低迷市況裡面減低損失。

image source:wiki
1 香港咁亂零售冇曬客人(1601筆)

香港好多行業都係互相掛鉤,旅客人數減少就會影響旅遊業,旅遊業受創就會連累到酒店業,冇人住酒店即係冇人會香港買嘢,咁零售業就會成為下一個受到衝擊嘅行業。冇遊客就無生意,市民就擔心人身安全都盡量唔落街,因為就算出街都有可能比警察指係暴徒,店員企曬係門口望空氣,都咪話唔陰公。受公眾活動影響,有啲鋪頭索性暫停營業,連1蚊生意都做唔到。

image source:pixabay:Alexas_Fotos

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年09月20日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『受反送中影響職業』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

你有壓力,我有壓力,但係都要搵食。




接續看下一篇