Be Water一樣有好大力量 勇武背後十大事件

Be Water一樣有好大力量 勇武背後十大事件

示威血淚背後,其實仲有好多令人窩心嘅小事值得被大家記住,就係因為呢D小事令香港呢個地方更加有家嘅感覺。

2019/09/16

Images Source: Facebook:渣哥 一九九六wikiwiki
反送中感動
非勇武一樣有貢獻

反送中運動由六月開始到宜家,相信好多人當初都無諗過呢場運動會持續咁耐,每個禮拜六日嘅示威已經變成香港人日常。呢段時間打工仔放假、甚至請假出嚟參與示威,話咁快暑假都過埋,學生都要開始返學,可以企出嚟嘅人可能比之前少咗。不過正所謂兄弟爬山,各有各做,除咗前線抗爭勇武派同和理非集會,其他咁多要搵食嘅市民,其實都自發性做咗好多唔同嘅事,而呢D大大小小嘅事都係另一種力量去支持前線示威者同激勵大家士氣。今日DailyView用網路大數據帶大家一齊嚟睇睇有邊十大事件啦。

DV小教室:網路溫度計透過網路大數據調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。


10 開學不合作運動(458筆)

又到9月,開學禮唱國歌就係其中一個環節,有中學嘅學生就喺播國歌嘅時候唱起 Do you hear the people sing,播完之後大叫「光復香港,時代革命」嘅口號。即使要返學,唔可以好似暑假咁上街示威,喺校園入面一樣可以表達訴求,目標一致各有各做。雖然有人話政治唔應該走入校園,不過呢班後生仔其實都只係爭取屬於自己嘅未來。

image source:Youtube/ 好片分享
9 香港之路和你拖(533筆)

30年前波羅的海200萬人拖手和平示威,今日香港一樣發起「香港之路」,實行以人鏈圍城,大批市民組成人鏈,人鏈甚至上到獅子山上。多間中學同大專院校都發起「聯校人鏈」行動,好多學生、已經畢業嘅校友都特登返嚟學校外面築起人鏈聲援罷課活動,亦都係返學鐘響完5分鐘先入學校, 用和平不合作方式,表達不滿。

8 行動代號:十點咆哮(650筆)

「光復香港,時代革命」,「五大訴求,缺一不可」兩句口號,係呢三個月入面可以話成為唔少人嘅口頭禪。就算你無出門口示威,最近喺屋企每逢10點都可能聽到有人大叫口號。十點咆哮行動非常簡單,就係每日10點準時係窗邊大叫口號,為大家打氣。除咗激勵街坊之餘,呢段日子大家壓力咁大,10點咆哮其實都係一個發洩嘅好方法呀。

image source:Twitter / @WH_YH22
7 香港敦克爾克大撤退(1276筆)

經過多次港鐵配合警方行動,安排令香港人好不滿,開始改口叫港鐵做黨鐵。搭港鐵分分鐘下站就俾警察上車拉,有見及此,唔少市民紛紛發起義載行動,齊心協力幫得幾多得幾多。9月1號機場和你塞示威,因為東涌綫同機場快線突然停止運作,示威者只可以行20公里離開,呢個消息傳出去之後,大量義載司機發起「接放學」行動。超過5000架車自發性去接示威者返屋企。呢一個場景被影低之後,令大家再一次感嘆香港人齊上齊落嘅團結。

image source:Facebook/ 金水
6 新。獅子山精神(1988筆)

過去大家講嘅獅子山精神,代表香港人不屈不撓、刻苦耐勞,而今日獅子山精神再一次被打不死嘅香港人重新演繹。當年雨傘革命已經有人喺山頂掛上示威直幡,今次反送中一樣無例外,除咗喺獅子山掛直幡、舉旗,更加有香港登山者更加去到阿爾卑斯山最高峰白朗峰山頂,插起「光復香港,時代革命」黑色旗,各有各做特色,為呢場運動增添一點溫暖色彩。

image source:Facebook/ 山中遊子
5 零gear街坊出動(2270筆)

抗爭活動遍地開花,去到唔同區,都有街坊落樓聲援示威者,當中令人最印象深刻嘅一次就係黃大仙街坊鬧走警察。就算係平日唔關心政治嘅市民,喺經歷721元朗事件警方疑似勾結黑社會,選擇性執法之後,都激起大家對警隊不滿,導致警察去到邊,街坊就出動鬧到邊。



4 喺高牆面前保護雞蛋(2389筆)

正值暑假,好多前線示威者都係學生,好多次示威事件最後都演變成為警方同示威者對峙,唔少大人為咗保護一班後生,都會企出嚟擋喺示威者面前,希望警方唔好出動武力,導致流血事件。好多呢D場景都被拍低,之後成為大家流傳感人嘅一幕。

3 Do you hear the Hongkongers sing?(5686筆)

香港人創意唔單止體現喺文宣品上,好多網友為反送中運動將歌曲重新填詞,呃到唔少人眼淚。講到最近最紅個首就係一班匿名網友寫嘅《願榮光歸香港》,各區都發起大合唱。一班自香港文化藝術工作者仲發佈咗一個管弦樂團加合唱團版本,MV由電影工作者拍攝,有氣勢又專業嘅製作,被譽為最屈機版本。


​2 課金撐革命(6080筆)

反送中運動中唔少示威者被拘捕同受傷,早前G20登報行動都需要資金,呢D活動都係由香港人積沙成塔,眾籌得嚟嘅錢。例如反送中受傷被捕者人道支援基金喺6月16日嘅大遊行期間公開籌款,資金用作反送中運動嘅醫療及法律等援助。短短一日已經籌到738萬。而「G20 團隊」 喺網站發起嘅眾籌活動,開咗1個鐘頭,就已經達到100萬美金嘅目標,最後9個鐘頭內籌得670萬,遠遠超出本身目標。所謂患難見真情,喺呢D重要關頭,見證住好多香港人無私付出,出錢又出力。

image source:Facebook/ 金水
1 高質文宣遍地開花(26430筆)

今時今日資訊大部分都係透過網上散播,喺呢段時期入面各種資訊泛濫,隔一陣打開Facebook又係新消息,要喺咁多花多眼亂嘅文字入面突圍而出,又可以吸引更多人關注,文宣就好重要喇。呢段日子見到好多網民做嘅文宣都好高質,為咗方便唔同國家嘅人都了解呢場革命,部分文宣仲有做唔成同語言,除咗圖,就連動畫都有。出貨快、質素高,唔少人都大讚文宣組手足,喺呢段艱難時期,更加體現香港人精神。

image source:Facebook/ 金水

分析說明:

本研究資料分析時間範圍為2019年06月08日至2019年09月13日。

網路大數據系統觀測港澳地區上萬個網站頻道,包括新聞頻道、Facebook、Instagram、Twitter及各大討論區、部落格等,針對討論『反送中運動期間令人感動嘅事 』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:


「各有各做,齊上齊落,他日煲底見。」



接續看下一篇