十大「反送中」產生漣漪效應嘅國際事件!亞馬遜雨林大火又關事?

十大「反送中」產生漣漪效應嘅國際事件!亞馬遜雨林大火又關事?

全世界都知道香港發生咩事,但世界有咩大事發生緊你哋又知唔知?

2019/09/13

國際大事
「反送中」運動只係香港人嘅事?

「反送中運動」自六月發生以嚟長期佔據香港各大報章、電視、網絡頭版,香港以外嘅世界發生嘅事都基本被運動相關嘅新聞覆蓋。但其實「反送中運動」亦無形中影響世界時局發展。而近日所發生國際大事或多或少都同香港有關。今日DailyView就用網路大數據調查咗十件同香港「反送中運動」有「牽一發動全身」嘅國際大事,究竟係邊十件事呢?

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

10 2019年夏季世界大學運動會(200筆)

今年7月3日至14日嘅夏季世界大學運動會喺拿坡里舉行,代表香港嘅年輕人連日嚟同世界各地嘅選手較量,努力為香港爭光,最後由香港網球代表張瑋桓同伍曼瑩奪得兩面銅牌,凱旋而歸。而喺依段「反送中」期間,亦都有一個打「網球」嘅人成為社會大眾焦點,佢係一位身穿gear嘅年輕人,喺示威現場揮動網球拍,回擊催淚彈。佢哋各自都用網球拍去社香港做緊嘢

image source:pxhere: mohamed hassan
9 2019世界游泳錦標賽(1413筆)

運動比賽係凝聚民心嘅最好方法,每次有港隊參與嘅國際體育比賽都一定受到廣大市民空前團結咁支持,而今次2019世界游泳錦標賽亦一樣。但原本想睇住港隊攞牌嘅市民好多都去到機場表達訴求,機場運作受影響。偏偏呢個時候撞正港隊出發比賽,好彩經過一輪溝通,港隊得到市民支持,最後順利前往新加坡參與比賽。其實有冇獎牌都好,香港市民永遠都係港隊嘅支持者!

8 英國脫歐(1536筆)

英國脫歐問題係英國內部以致歐盟都糾纏咗幾年,英國國內對於脫歐細節、「軟脫歐」定「硬脫歐」仲係爭論不休。脫歐問題仲令前首相文翠珊落台,而新上任嘅約翰遜至今似乎仍然係寸步難行嘅情況。之但係呢兩位脫歐人物都曾經公開評論香港「反送中運動」,要求中國履行《中英聯合聲明》保障港人嘅權利。先唔講佢哋係咪借香港爭取國內支持,但都叫增加香港情況嘅曝光率!

image source:pixabay:succo
7 長榮空服員罷工(3311筆)

機場係一個國家或地區嘅聯外之窗,癱瘓機場就等於將屋企嘅門反鎖,入面嘅人出唔到去,出面嘅人入唔到嚟。2019年台灣長榮航空公司空服員同長榮航空因勞資問題發起罷工,歷時一個幾月,多班航班受影響,營業損失數以億元計,最後雙方達成協議,罷工結束。一個月後嘅香港,反對逃犯條例修訂嘅市民堵塞機場離境大堂同前往機場嘅交通,睇嚟大家開始明白點做先會令當權者驚㗎!

image source:wiki
6 澳門行政長官選舉(3618筆)

澳門一直俾人嘅感覺都係「好乖」、「好聽話」嘅特區,呢次行政長官選舉仲要係零競爭,而日前行政長官參選人賀一誠更以高票當選,好完美咁展示俾正在抗爭嘅香港人睇,澳門嘅「一國兩制」係幾咁「不變形、不走樣」。不過,睇返香港市民「五大訴求」中嘅「實現雙普選」,正正係想話畀澳門人聽,除咗繁榮穩定,健全嘅政治、選舉制度同樣重要!

image source:wiki
5 亞馬遜雨林大火(5148筆)

巴西亞馬遜雨林發生大火令全球關注,雖然與「返送中運動」無關,但就同香港人生活息息相關!數據顯示,過去亞馬遜部分雨林毀林主要原因係因為過度牧牛,而根據美國農業部(USDA)嘅統計,香港係巴西牛肉進口最多嘅地區,即係話香港人係毀林嘅「幫兇」!全球唔少環保團體一直譴責當地政府、企業唯利是圖,導致雨林面積減少。至少係對抗高墻嘅決心上,香港人係同環保團體一致嘅!

image source:wiki
4 京都動畫縱火(5676筆)

香港一直都有好大一群動漫愛好者,日漫除咗係閒時讀物,仲令好多人倘開心扉,進入天馬行空嘅世界,有啲動漫仲係陪住香港人成長。係2019年7月18日,日本著名動畫工作室—京都動漫發生殺人縱火事件,造成數十人傷亡,事件令全世界不論係咪動漫迷都十分震驚。而香港第20屆漫畫博覽會展場都設立留言板,俾市民為京都動畫受害者祈福,希望大家以後都可以平平安安,走出悲傷,重建返自己深愛嘅嘢。

image source:wiki
3 溫布頓網球錦標賽男單決賽(7389筆)

又一體育盛事上榜!排第三嘅居然係溫布頓網球錦標賽男子單打!今次錦標賽嘅看點在於男子網球三大巨頭—塞爾維亞嘅祖高域、西班牙嘅拿度同瑞士嘅費達拿齊齊落場,最後三人更包辦冠亞季軍!係佢哋嘅網球生涯中曾經有起有跌,當中有人因傷患不得不修養一段時間後再復出。希望香港人同佢哋一樣,可以哭泣,但不要洩氣;可以悲傷,但不要放棄!

image source:wiki
2 中美貿易戰(50396筆)

能夠係十大數據中佔咗兩項,可想而知相其受關注嘅程度! 雖然特朗普可能只係利用香港刺激中國,但可見嘅未來仍然難以估計貿易戰幾時平息。姑且唔講美國背後嘅政治動機,但只要貿易戰一日進行緊,香港人就可以藉助美國嘅力量為香港爭取更多嘅曝光率,加上《香港人權與民主法案》正係美國國會討論中,若果法案通過,將會影響中美往後嘅談判進程!

image source:wiki
1 G20峰會(100501筆)

如果想為「返送中運動」爭取國際支持,令更多國家對香港伸出援手,大把大把咁摑落香港政府度,淨係搵美國幫手係唔夠嘅!係舉行G20峰會嘅大阪市就有數十名香港學生係街頭集會,而香港本土亦舉行過集會同遊行,希望G20成員國關注香港問題向北京施壓。雖然係中國壓力下G20其他成員並未就香港問題進行討論,但係德國、英國、美國等歐美大國都係其他場合表示過對香港問題嘅關注!

image source:wiki

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年09月06日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『國際大事』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

無論係咪生於亂世,你都有種責任。



接續看下一篇