香港十大政論節目名嘴!反送中大熱嘅吳志森竟然只得第七名?

香港十大政論節目名嘴!反送中大熱嘅吳志森竟然只得第七名?

燒山好嘢

2019/09/09

Images Source: facebook/蕭若元Youtube/大紀元wiki

香江議政,關係民生

正所謂有人嘅地方就有政治,有人嘅地方就有江湖,香港地方雖細,但政治環境相當複雜。香港作為英國殖民地,又喺1997年交畀中國統治,直到近年又出現本土思潮,香港人嘅身分認同有各種持分者同諗法。加上,香港係國際金融重要嘅城市,對世界經濟有舉足輕重嘅影響力,仲佔咗中國外來貿易嘅一大部份。今時今日香港咁大件事,仲只係識飲飲食食,仲係我唔識政治,隨時俾人笑。面對咁嘅亂世,我哋更需要智者點燈,帶領我哋令香港走向更美好嘅境地。今日,就等DailyView細數十大喺網路平台開政治節目嘅香港名嘴,等我哋一齊學吓嘢喇!

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

十位香港嘅政論名嘴,陪住大家走過反送中

10 傑斯

——曼聯球迷

傑斯,一位土生土長嘅香港人,從事外貿,游走中、港兩地超過二十年,佢親身經歷咗中國經濟改革開放嘅興衰,見盡中、港兩地文化差異嘅變化。讀萬卷書,不如行萬里路,呢位人生閱歷咁豐富嘅時事評論員,目前喺香港D100電台主持兩個節目,分別係《北京飯店》同《北上頻道》。其中《北上頻道》喺8月24號話要「壽終正寢」,改名做《不上頻道》,由北上到不上,都咪話唔係諷刺現今嘅政府。

9 鄭經翰

——鄭大班

鄭經翰?八十年代打後出世嘅香港人,真係可以話由細細個開始已經成日聽過佢個名!佢1994年喺ATV搞政論節目《龍門陣》,1995年起喺商台主持早晨政論節目《風波裡的茶杯》,都極受港人歡迎。 2004年涉及商台封咪事件,《風波裏的茶杯》先後再喺香港數碼廣播有限公司,同D100網台播出至今。呢個老牌節目,主持人數幾經轉變,唯一不變嘅,係大班依然喺到,為港人議論時政。

8 鄭家富

——政海一聲笑

前立法會議員鄭家富,喺民主黨前任知名成員,因政見不合退出該黨,亦都參與2012年「拉布攻防戰」,言辭犀利,大受香港網民激讚。雖然佢自2012年7月之後,都無做立法會議員,但並唔代表佢放棄時事舞台,鄭家富喺2012年中已經加盟香港數碼電台,同年年底轉投D100至今,目前主持《風波裡的茶杯》,相當受港人歡迎。想聽鄭家富以佢嘅為政經驗議論時政?即刻去片喇!

7 吳志森

——唔止頭條新聞

吳志森,相信各位香港人對佢都唔陌生,皆因佢已經主持香港電台極受歡迎嘅《頭條新聞》多年,又扮大帥又做太后,幽默之外都相當諷刺。但你又知唔知,佢仲有主持網台節目?佢喺D100主持《風波裏的茶杯》,自己喺YouTube都有開《森直口快》同《志森與志豪》嘅節目頻道,《頭條新聞》周不時都休息,唔緊要,我哋一齊去聽佢嘅節目,繼續笑中有淚,為香港加加油!

6 黃毓民

——政壇教主

前立法會議員,資深傳媒人同時事評論員黃毓民,支持者尊稱「教主」,反對者叫佢做「癲狗」。一句但開風氣不為師,黃生雖然受到好多爭議,但佢影響嘅人好多,包括香港本土派知名人物梁天琦。佢離開咗立法會,但並唔代表佢遠離香港時事,一直都用各種各樣嘅渠道發聲,包括自己創立MyRadio嘅網台節目,講政治講波講馬講故,依然吸引咗無數香港人收睇,依然影響緊好多人。

5 桑普

——政治評論人

桑普學識淵博,既係香港D100電台《左右大局》、《北京飯店》同自由亞洲電台《桑海神州》嘅主持,又係律師,仲兼埋各個平台嘅專欄作者,出埋書,相當把炮。《左右大局》專講香港時事近況,而《北京飯店》就係專門講「政治化的中國,大陸化的香港」,唔單止講香港,連中國、台灣都會評論一番。《桑海神州》嘅性質都類近,但就更多講國際局勢。咁鬼高質嘅Youtuber,仲唔睇?

4 啤梨

——調理農務蘭花系

香港社運人士,調理農務蘭花系創辦人馬建賢,花名啤梨。啤梨會做網台,本身只係玩票性質 ,但隨住知名度上升,廣受歡迎,仲喺 2019年3月正式自立門戶,脫離MIHK香港製造網絡電視,成立個人的全新網台「啤梨頻道」。佢嘅網台節目專講本地時事,喺呢段「反送中」嘅社會運動期間,呢個網台仲周不時去到現場直播,走到最前線,難怪咁多香港人都鍾意睇佢哋網台節目。

3 李慧玲

——敢言黃絲帶

香港資深傳媒人李慧玲,早年曾喺商業電台主持Phone-in節目,而家喺網台D100主持《左右大局》。李慧玲嘅時事評論,風格向來敢言,就算得罪其他人都要講出自己嘅諗法。其中,最出名嘅係,前任特首梁振英曾喺2018年發律師信畀佢,話要告佢喺6月28號嘅節目誹謗佢,但李慧玲就冇有怕,話自己係為公眾發言,唔會道歉。最近「反送中」嘅時事評論,佢依然敢言,值得大家支持。

2 劉細良

——香江才子

香港資深跨媒體時事評論員,曾任香港政府屬下的中央政策組全職顧問,又同其他知識分子搞過《主場新聞》,相當有影響力。佢喺2014年同其他人成立「城寨」網台,講香港時事,而喺2019年6月嘅「反送中」引發社會運動,「城寨」網台嘅收視人數急升,成為咗網民好留意嘅時事節目。「城寨」網台有好多主持,各式各樣嘅節目,都好值得大家睇睇,總有一個啱你心水。

1 蕭若元

——多謝燒山

網路政論節目紅人蕭若元,網民戲稱「燒山」、「燈神」,每次喺YouTube上傳最新時事評論見解,佢總會引起網民嘅關注,認真難得。點解會成日俾網民熱議呢?事關一眾網民認為佢對未來嘅預測,往往都係相反嘅,「香港網路大典」仲設有蕭若元「燈神」事蹟條目,由2014年到2019年,詳細咁列出佢嘅成績。其實蕭生係資深傳媒人,講嘢有文有路,大家講笑之餘都要細心學吓嘢。

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年09月02日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『香港十大政論節目Youtuber』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

網路時代,眾聲喧嘩。

接續看下一篇