林家謙、MIRROR都係最紅嘅樂壇生力軍!唔知你又識幾多個?

林家謙、MIRROR都係最紅嘅樂壇生力軍!唔知你又識幾多個?

試吓唔好淨係識聽舊歌啦~~~

2019/08/05

香港仲有好多高質音樂人㗎!

好多人都覺得香港越嚟越冇發展音樂才能嘅地方,甚至乎會覺得公司埋沒左佢哋嘅才華。NO~其實依家仲有好多想留喺到搞好香港樂壇嘅音樂人,今日DailyView就用網路大數據帶大家睇下以下呢十位樂壇生力軍,佢哋喺2018到2019都出過啲好高質嘅歌曲或專輯㗎!唔知大家又有冇聽過佢哋嘅作品呢?

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

image source:fb/林家謙

10 李晧軒

2018年4月先出道嘅Will,今年先得24歲,但已經拎咗第41屆十大中文金曲頒獎典禮嘅最有前途新人獎優異獎,幾叻叻豬!但邊個又會諗到原來佢中三就輟學,出嚟賺錢養活家庭呀?佢目前出過《窮我一生》、《明明想抱緊》同最新嘅歌曲《講感情傷感情》。唔好睇小製作班底呀!呢首歌係由舒文做監製,林夕填詞,Larry Wong作曲編曲㗎!


9 陳嘉茵

佢就係As one嘅成員陳嘉茵啦!由於佢哋喺2017年解散,於是2018年嘉茵就簽咗新公司單飛出道啦~仲係對佢冇乜印象?記唔記得之前有條好Hit嘅告白氣球跳舞片呢?之唔係嘉茵同歐鎮源Tyrese 一齊跳囉!嘉茵仲曾經用踢館者嘅身份去咗台灣參加《希望之星》,最後仲拎埋總亞軍𠻹呀!大家快啲去聽佢今年嘅新歌《火星文》支持下佢啦!


8 Dusty Bottle

呢隊樂隊Dusty Bottle喺2016年成立,2018年終於加入咗環球唱片(香港)旗下嘅Brave Music出道~成員分別有keyboard手JNY(JNYBeatz)、結他手Jeff、bass手Matthew,同埋鼓手Kay,至於vocal Kerryta就2019年先正式加入~由於之前未有正式vocal,所以佢哋嘅作品係feat咗唔同歌手,例如同韓國爵士天后Moon合作嘅《How Could You?》,而好多人都喺M記聽完《You Don't Know Me》都特登喺MV到留言大讚好聽!


7 林家謙

雖然林家謙今年先正式出道,但原來《心之科學》、《矛盾一生》、《壞與更壞》等等都係佢嘅作品黎㗎!佢同楊千嬅,張敬軒同衛蘭等前輩都合作過~而佢本人嘅第一首派台歌《下一位前度》都大受好評!呢首歌無論作曲,編曲定監製都係家謙做晒。不過努力必有回報,《下一位前度》喺KKBOX嘅本地新歌榜連續三星期都蟬聯第一名呀!

6 譚杏藍

應該都冇咩人唔識譚杏藍(小花),因為佢本身就係一位好出名嘅Youtuber。小花係由亞視嘅第一屆《亞洲星光大道》出身,約滿後回復自由身。不過2018年開始佢就出派台歌啦!例如有《Hey Hey講到邊》、《傻大姐》、《不得了小姐》等,而最新歌曲《早餐歌》仲要係由小花本人同ToNick嘅趙善恆恆仔以情侶檔身分一齊填詞𠻹!唔怪得首歌咁sweet啦!

5 趙慧珊

喺澳門出世嘅Aka都係女子組合Super Girls嘅成員,唔好睇佢細細粒好可愛,原來佢今年已經32歲啦!Aka嘅第一首派台歌《你在聽嗎?》就已經拎到唔錯嘅成績啦,仲要係2019勁歌金曲優秀選第一回嘅得獎歌曲嚟𠻹!好多聽眾都表示好驚喜,估唔到Aka係唱得之人!而第二首新歌《生來起舞》,靈感係取自於Aka由細到大嘅親身經歷,成首歌好正面㗎!


4 洪嘉豪

上年先出道嘅洪嘉豪,就已經即年拎埋新城勁爆頒獎禮嘅勁爆新人獎同埋叱咤嘅樂壇生力軍金獎啦!而佢已經出咗好幾首派台歌㗎啦!例如係《半天空檔》、《表情符號》同埋《十號儲物櫃》。幾首入面其中一首叫《掉進海的眼淚》MV仲已經係YouTube超過咗100萬次點擊率啦!原來洪嘉豪仲係呢首歌嘅作曲人𠻹!睇嚟洪嘉豪會係一隻黑馬喎!


3 MIRROR

相信大家都聽過《全民造星》啦?MIRROR嘅成員就係嚟自其中12位參賽者啦!年紀最輕嘅今年都係20歲炸!呢隊除咗係香港第一隊男子跳唱大型組合之外,仲係第一隊出道49日就喺九龍灣國際展貿中心開演唱會嘅團隊!係咪好有噱頭呢?而最受歡迎嘅成員姜濤甚至擁有自己嘅派台歌《一號種籽》,一個月都有超過20萬次點擊,新人嚟講算叻仔啦!


2 戴祖儀

原來戴祖儀係有馬來西亞國籍㗎!本身佢喺英國讀法律系,但返到香港都係決定向音樂發展,上年得到星夢娛樂嘅賞識~佢嘅第一首主打歌《未開始的故事》仲要係TVB《愛情來的時候》嘅主題曲𠻹!睇嚟星夢都好捧佢喎XD不過祖儀真係有實力㗎,2018年已經拎咗六個新人獎。而最近同古家峯合唱嘅新歌《你知不知道》,推出幾日已經受到激讚!


1 曾樂彤

曾樂彤2017年就簽咗英皇娛樂做歌手,仲出咗一隻個人專輯《meme》𠻹!其中一首叫《青春、戀愛和意外》就係佢嘅第一首冠軍歌啦。2018年佢都拎咗唔少獎,例如係第1屆KKBOX香港風雲榜嘅年度最佳新人獎,同埋十大中文金曲最有前途新人獎金獎等等~其實樂彤真係好叻豬,除咗唱歌之前幫手拍張敬軒嘅《百年樹木》MV演技都俾人讚㗎!


分析說明:

本研究資料由《KEYPO大數據關鍵引擎》提供,分析時間範圍為2018年07月24日至2019年07月25日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『2018-2019樂壇新人』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


「加入香港網路溫度計Fan Page正過睇C1啊!」>>>

-------------------------------------------------------------------------------

DailyView曰:

「一齊為香港樂壇打氣啦!」




接續看下一篇