無雷／復仇者聯盟4熱映　重溫網民最愛10大Marvel英雄！

從小被培訓練成為間諜、殺手，憑住俐落果斷嘅格鬥技巧，純熟槍法同受訓過嘅強大心理質素，令佢即使無超能力，無盔甲，都一樣係復仇者入面一個好嘅重要角色，身為一個女角色，都無比一班男人壓倒氣勢，打起仗嚟一啲都唔輸蝕！

因為過去身分，過去做過唔少「唔見得光」嘅任務，後期好多時候都表現出過去對佢造成嘅精神創傷，當佢揭露自己內心嘅心理壓力同過去造成嘅陰影，一班fans應該都睇到個心拿住拿住。呢D過去令脫離間諜身分，成為復仇者一員嘅佢更加「有血有肉」。

黑豹電影出現得比其他英雄遲，但人氣真係無得輸！喺瓦干達呢個神祕地方出身嘅黑豹，繼承王位保護國家，幾次戰役入面出現幫復仇者扭轉局勢。敏捷反應、速度同力量加上黑豹妹妹專門設計嘅戰衣，黑豹嘅打鬥場面更可以話係咁多套復仇者電影入面最精彩嘅一次，瓦干達民族色彩都係備受注目。咁多年嚟，為保護國家而低調生活嘅瓦干達人，後來決定分享擁有嘅資源，幫其他國家解決危機、幫復仇者擊退外敵入侵地球。女軍隊個個都驍勇善戰，每一次出現都令人懾服於佢地嘅氣勢之下。

原本只係一個孱弱嘅士兵，因為被注射超人士兵血令佢擁有異於常人嘅力量、反應、速度，軍隊出身嘅佢自然成為帶領一班復仇者嘅人物。被冰封多年再喺現代出現嘅美國隊長最令人佩服嘅係佢嘅意志力，同堅定嘅心態，復仇者多次陷入困境，都係用軍人永不放棄嘅精神鼓勵大家。而美國隊長寧死不屈嘅精神，同Iron Man科學家理智分析局面，接受現實嘅性格相反，導致後期兩個人立場開始對立，復仇者一度分成兩派。

話Iron Man係漫威宇宙入面最重要嘅角色簡直係當之無愧。由一開始一個提供武器嘅軍火商，後來變成親自上戰場嘅英雄，身分轉變、矛盾令角色情緒更豐富。Tong Stark有錢，有頭腦又有型，真係一個男女通殺嘅英雄。

另一方面，演員戲裡戲外心路歷程都一樣受人關注，當時拍Iron Man第一集，漫威面臨破產，所有希望都寄託喺Robert Downey Jr.身上，而Robert Downey亦都面對緊人生難關，對雙方嚟講都係一個重大賭博。最後當然係賭贏，仲贏得好徹底！成為漫威其中最具代表性人物之外，同時奠定之後漫威系列嘅基礎。

作為復仇者成員最年輕嘅角色，蜘蛛俠每次作戰喺驚險之中流露出嘅少年感帶嚟唔少笑點。同好多人一樣一直想成為英雄，一開始只係保護自己社區，但年少氣盛嘅佢又點會滿足於此。機緣巧合遇到Iron Man後，一直證明自己，希望得到認同。比起其他人仍然係個「細路」嘅蜘蛛俠，活潑、唔知驚嘅性格，同其他復仇者比可以話係完全兩個風格，Tom Holland喺美國隊長3出現之後已經吸納一批fans！2017蜘蛛俠獨立電影樣大受歡迎，復仇者聯盟4之後,值得期待一下今年會上映嘅蜘蛛人第二套獨立電影！

頭先提及片長有成3粒鐘，但係真係入場睇完之後，你一定心諗：咁就3個鐘？絕無冷場嘅劇情，加上出演角色咁多，每一秒都咁精彩，大家都知道漫威成日喺細節位收埋唔少彩蛋，真係睇到人眼都唔捨得眨，怕錯過重要畫面。

比起以前其他漫威電影，終局之戰描寫好多英雄內心世界部分，上一次戰敗後嘅無力感，失去同伴至親嘅哀痛，對未知嘅恐懼，對自己嘅反思等等都令唔少人由頭喊到尾。電影中每個角色演技都真係值得一讚，令觀眾都以為自己同樣置身漫威宇宙之中。

當依家全球都為呢套漫威巨作瘋狂嘅時候，你身邊一定都有漫威fans，唔想無得同親朋好友一齊討論？即管比個機會——終局之戰，話唔定睇完你會比漫威嘅魅力吸引而加入漫威fans一份子。

終局之戰係有史以嚟出演角色最多，片長都係最長嘅電影，全部角色同時出現擁有同一個目標去戰鬥，嗰種震撼真係好值得感受吓。
加上個個睇之前嘅忠告都係：記得去定廁所。片長長達3個鐘，絕對值回票價，唔係敷衍了事。

今次終局之戰，係漫威鋪排咗11年嘅大製作，亦都係為22部電影劃下一個完美結局。一班fans期待咗咁耐，未上映前網路上已經有好多劇情預測，首映之後到依家可以話係零負評。單係呢個原因就已經足以令咁多年嚟累積嘅漫威fans入戲院支持啦！