哥哥,永遠嘅香港巨星。十六年喇!我哋仲好關心張國榮嘅十件事。

哥哥,永遠嘅香港巨星。十六年喇!我哋仲好關心張國榮嘅十件事。

總是容易被往事打動 總是為了你心痛

2019/03/29

Images Source: 網路圖片
世界時刻提醒我你曾經閃亮。

張國榮,哥哥喺《阿飛正傳》有句對白:「我聽人講依個世界有隻雀仔冇腳㗎,佢只可以一直咁飛啊飛,飛到攰嗰陣就喺D風入面瞓覺。依種雀仔一世只可以落地一次,嗰次就係佢死嘅時候。」哥哥就係一隻冇腳嘅雀仔,擁有一對帶佢飛翔嘅翼,令佢可以追逐太陽,可以感受風雲。但,佢一生只可以飛,就算係狂風暴雨,黑夜無光,都只可以飛,直到生命終結一瞬間。又到4月1日喇,等DailyView帶大家睇吓,哥哥離開我哋十六年喇,我哋仲好關心有關於佢嘅十件事。

DV小教室:香港網路大數據觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

image source:IG/chloescinema


10 4月1日,傷心愚人

——「往事不要再提人生已多風雨」

2013年愚人節之後,香港人注定永遠只能夠有一個黑色傷心嘅4月1日。每年愚人節,對無數哥哥嘅歌迷影迷嚟講,已經唔再係一個可以講笑惡作劇嘅節日,而係需要好好咁重溫哥哥風采嘅日子。有幾多人,會喺呢一日再細細聽哥哥嘅歌聲,睇哥哥精湛動人嘅演技?「愛是我的愛,若毫無價值,為何值得流淚?」4月1日,已經唔再係愚人節,而係屬於我哋嘅哥哥,張國榮。

image source:IG:leslliec
9 絕世好人張國榮

——「我要他生都有今生的暖意」

哥哥有幾好人?好人到已經成為網民嘅「月經Post」!張柏芝撞車,哥哥送護身符。鍾鎮濤低潮時,哥哥相助佢演出「九星報喜」一角。張國榮仲勸過Eason戒煙。張衛健受哥哥提攜,叫佢做表哥。哥哥最早賞識黎明,令佢大紅大紫。Twins仲係新人組合嗰陣,哥哥竟然答應出演MV。N年前,張國榮點名讚賞古天樂,至今佢都仲好感激。好人好事,真係仲可以再數落去。

8 為何哥哥要離去?

——「你始終在我心裡」

張國榮事業有成,愛情得意,人品人緣都好好,點解一位咁完美嘅人,竟然會選擇自殺?我哋真係好難相信,好難接受,於是對哥哥嘅死有好多唔同猜測。好似話愛情生變,不堪壓力,拍鬼片《異度空間》撞鬼咁,但其實大多都係流於吹水。最有說服力嘅,係來自哥哥身邊嘅親友所講,嚴重嘅抑鬱症。生理上嘅痛苦,令哥哥選擇離別,留下愛佢嘅我哋,活喺我哋心中。

image source:IG:chloescinema
7 哥哥,唐唐,一生一世

——「約定他生再擁抱」

誰比你重要?愛情路途一追再追,我哋不過只係想遇見一生中最愛,好似張國榮哥哥同唐鶴德唐唐咁:噢,你也在這裡嗎?1997年,哥哥係紅館演唱會為唐唐高歌一曲《月亮代表我的心》,比電影更加動人浪漫。佢地有次俾狗仔隊突襲,哥哥唔止無迴避閃躲,反而捉緊唐唐對手,無嘢可以令佢地放手。哥哥離世,唐唐寄語:「天長地久有時盡,此愛綿綿無絕期。」至今此愛仍然繼續。

image source:IG:dhttong
6 Leslie之名由來

——「你會記得,我是誰」

歡迎張國榮,Leslie!香港人以前一定喺電視機聽到呢一句話,真係聞字有聲,成為我哋嘅集體回憶。係我地腦海念念不忘嘅,Leslie,到底點解哥哥當初會改呢個名呢?張國榮曾經自白,佢原本英文名叫Bobby,但太似寵物名,決定改做Leslie。Leslie係來自哥哥最愛經典《亂世佳人》之中嘅演員Leslie Howard,加埋個名夠中性,雌雄合一,相當貼切哥哥嘅人格風采。

5 情人毛舜筠

──「模糊地迷戀你一場 就當風雨下潮漲」

哥哥愛毛舜筠,係人都知。喺兩個人都青春光輝嘅時候,佢哋之間係愛情;經歷分手,因為電影《家有囍事》見返面,又親近返嘅時候,係友情;走到最後,毛舜筠結咗婚,張國榮有一生最愛唐先生,兩人之間,依舊情深。嗰種情深唔止係佢哋拍拖嗰時,哥哥同毛舜筠求婚嗰一霎那長相廝守嘅傾慕,而係昇華到兩個人無辦法割捨對方嘅感情。

image source:IG:chloescinema
4 張國榮就係程蝶衣

──「I am what I am」

當年哥哥以《霸王別姬》蜚聲國際,喺世界電影圈粉墨登場,好多人話,佢演活咗程蝶衣;喺2003年4月1日之後,更多人講,張國榮就係程蝶衣。陳凱歌話佢第一次同哥哥講咗兩個半鐘劇本,哥哥話:「我就係程蝶衣。」人生戲一場,哥哥同程蝶衣好似,演員同角色中間嘅邊界好模糊,就好似係一場宿命咁,戲內外都係絕代風華,劇終完場都係完滿但遺憾。

image source:IG:chloescinema
3 哥哥、梅姐,執手友情

──「垂下眼睛熄了燈 回望這一段人生」

張國榮同梅艷芳,哥哥同梅姐,十二少同如花,人生就好似一場戲,謝幕之後,兩位巨星喺2003年一齊步落舞台。梅姐介紹哥哥係佢「生命中唯一嘅好朋友」,哥哥話佢同梅姐好似兄妹,兩個仲講笑話如果梅姐40歲單身,哥哥娶佢。哥哥走嗰時,梅姐係39歲,喺葬禮傷心到要人扶,同年年尾,梅姐40歲,亦都步落人生舞台,一前一後,令人感動嘅巧合。

image source:IG:leslliec
2 永恆留聲

──「風繼續吹,不忍遠離」

哥哥喺1983年推出第二張廣東話大碟《風繼續吹》,同名主打歌唱到街知巷聞,之後嘅首首金曲,張張大賣嘅大碟,令佢成為歌壇嘅國際巨星,上晒神壇。哥哥成名自《風繼續吹》,2003年7月,環球唱片推出哥哥遺作《一切隨風》,首尾呼應,係送畀歌迷最後一份禮物。好彩嘅係,十六年過去,一路隨風而行嘅歌迷並冇消散,冇人離去,只有懷念。

1 男扮女裝

──「我就是我,是顏色不一樣的煙火」

哥哥?張國榮?Leslie?係,亦都唔係。哥哥喺2000年《熱情》演唱會用《我》依首歌做壓軸,講話,佢演唱會嘅主題就係講人係要識得欣賞自己。佢同前衛時裝大師Jean Paul Gaultier合作,準備咗一場極具性別衝擊嘅演唱會,哥哥以長髮女裝表演,打破刻板嘅性別定位,但就引嚟香港八卦傳媒嘅刻薄報導。哥哥行得太前,為漆黑夜空盛放一朵燦爛嘅煙花。

image source:IG:chloescinema
芳華絕代張國榮

——「傾國傾城,是我大名」

張國榮,係香港前無古人後無來者嘅Super star。哥哥曾經喺梅艷芳嘅演唱會做嘉賓,合唱一首〈芳華絕代〉,型男索女,兩人即使當時已經病重,但佢地嘅表演仍然震攝全場。「唯獨是天姿國色,不可一世,天生我高貴艷麗到底」,恰恰係佢地嘅寫照,呢一首歌,亦成為咗只有佢地先可以最好呈現嘅樂曲。因為,自此之後,香港已經再無兩位芳華絕代嘅明星喇!我哋對張國榮回憶,正好似我哋對香港種種美好事物嘅追憶,曾經美好,可惜一切都無法回來。唯一慶幸嘅係,哥哥留下無數影視經典界我哋,即使佢離去,只要抬頭睇睇天上星星,我哋仍會記起那顆最耀眼嘅光芒,哥哥,張國榮。


分析說明:

本研究資料分析時間範圍為2018年3月24日至2019年3月25日,共一年。

網路大數據系統觀測港澳地區上萬個網站頻道,包括新聞頻道、Facebook、Instagram、Twitter及各大討論區、部落格等,針對討論『張國榮 』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


DailyView曰:


 每當4月1號,我便想起你。


接續看下一篇