2019
08
01
1602

片/解放軍恐嚇港人後果自負?網民狂笑片中英文字幕嘅秘密

香港嘅維穩力量,唔止得三萬警察嘅,仲有1997年進駐香港嘅解放軍。駐港解放軍一向都無咩新聞,好多香港人都係得個知字,唔會點理駐港解放軍。不過呢,近排香港「反送中」逃犯條例抗爭咁多衝突,解放軍都忍唔住要講幾句喇!
   

Image source:YouTube:Chen Jin截圖

文/積遜猿

7月31號,中國解放軍駐港部隊司令員陳道祥出席香港慶祝建軍92週年招待會時致辭,話支持特首林鄭月娥同香港警方「懲治暴力」,「一系列極端暴力事件,嚴重破壞了香港繁榮穩定的大局」,「嚴重觸碰了『一國兩制』的原則底線,絕對不能容忍」。同時,陳司令仲發佈咗最新嘅駐港解放軍官方宣傳片,引起咗網民熱烈討論,覺得解放軍明顯針對香港示威者喎。

駐港解放軍嘅官方宣傳片,片長三分三秒,分為四個主題,「反恐」、「維穩」、「防衛」同「同心」。「反恐」係講解放軍點樣喺高樓大廈之間對付恐怖份子,片中解放軍攞住碌竹撐起行牆入窗,好似八十年代動作片咁,唔講以為係TVB特技,認真威武。

「維穩」一開波就聽到解放軍用粵話大叫:「後果自負!後果自負!」之後仲見到解放軍攞住盾係咁開槍,嚇到班示威者走佬,心血少都比佢嚇親。「防衛」狂Show坦克呀機關槍呀直升機呀軍艦呀,火力十足,打到座山就爆炸咁。「同心」請嚟大班市民,Show吓佢哋有幾愛駐港解放軍,有普通話有粵語,真係血濃於水,「做一個中國人,我感到非常之驕傲」,「我愛祖國嘻嘻嘻」(心形手勢)。

Image source:YouTube:Chen Jin截圖

雖然該官方宣傳片嘅簡介話「發布官宣主要是針對近來插手香港事務的外部反華勢力,並不針對愛港民眾」,但喺呢個敏感時期,網民見到呢條官方宣傳片,仲要有粵語講「後果自負」四個大字,緊係覺得喺針對緊香港示威者喇!網民嘅摩擦力好高,唔單止話片中有市民講「我覺得解放軍可以同我哋啲香港市民打成一片」別有意思,仲見到英文字幕係"What a bully",好多網民見到都笑到腸都跌埋出嚟。

仲有網民攞埋美國軍隊嘅宣傳片做比較,話係「差天共地」,「睇完想加入美軍了」,仲批評「人地美軍用黎守護國家,佢就用黎控制示威活動,個level都差幾廿條街」咁喎。 

一齊睇睇網民點講:

「打人民出動呢d軍備真係超英趕美囉!」

咩大陸game宣傳片呀又?」

「都2019年,啲工具同武器仲係咁流?」

「點解冇摺被片段?解放軍最強係依樣野。」


延伸閱讀►►►


片/方皓玟、RubberBand七月新歌,願港人甦醒

片/毆鬥傷人,警察走人!《紐約時報》談721香港元朗黑夜

片/蕭若元今次唔燈,教你向藍絲講「警察係咪過度使用武力?」



本則時事分析,你覺得?