2019
07
22
2083

銀髮一族又發威!婆婆踩入元朗警署,狂數警方幾十分鐘!

尋日(7月21日)新界元朗區出現大批手持藤條、鐵棒同埋木棍等武器嘅白衣人,喺地鐵站無差別攻擊民眾。多名市民因為攻擊而受傷,但警方並無即時喺現場逮捕任何一個人。今次嘅事件引起社會各界關注,好多市民都認為警方喺依件事上面,有「警黑」合作嘅可能。唔少網民都表示對警方「維持治安」嘅能力抱有懷疑,更有唔少市民親身到元朗警察反映意見,當中有一位婆婆,喺元朗警察指責警員幾十分鐘。
   

image source蘋果動新聞HK Apple Daily直播截圖

文/偉文

早喺尋日發生元朗白衣人無差別攻擊民眾之前,網路已經流傳有「藤條」圖片,仲有消息話元朗有「黑社會」成員係喺尋日進行「藤條教仔」嘅行動,要對身穿黑衫嘅「反送中」示威者進行武力驅趕。


image source:Facebook: 聲討教協

去到7月21日,真係有多名身穿白衫並手持武器嘅人,無差別攻擊民眾,令到多名市民受傷。據消息所指,當時並無警員到場阻止白衫人士,多名市民報稱冇辦法打通999報案中心嘅電話,就算有打通嘅,竟然被回應話:「驚就唔好出街。」

image source:Twitter:wilsonleungws

由於尋日元朗事件入面,警方並無有力地保護被攻擊嘅市民,亦無即時逮捕任何一個白衫人士,引起廣大市民對警方嘅執法專業同能力抱有懷疑,更有唔少市民親身走到元朗警署表達不滿。

有一名婆婆喺今日走到元朗警署指責當地嘅警察,依到就節錄幾句婆婆嘅說話畀大家睇睇:

「點解你哋D人咁殘忍㗎,有冇人性㗎你哋?」


「你做大龍鳳都做好睇D啦!冚𠾴唥穿晒窿,畀人哋知道晒嘅!」


「你哋同黑社會有咩分別啊?」


「冇理由畀身份證你㗎!(警察)依家信唔過啊!」


「我哋俾人打到死,都係唔合法嘅,都係又鎖又拉嘅,公平咩?」


「你哋愧對自己祖宗啊!愧對下一代啊!」


「如果人哋知道啊!啊我爸爸做警察㗎!以前就好光榮啦!(依家)聽到你爸爸做警察,你唔好埋嚟啊!你快D行開……你話你做依行幾賤!依家做到幾賤格啊!」


「如果我個仔娶著你依D,我一定叫佢同佢離婚!」


「黑警對黑社會,兩兄弟,齊上齊落!吓!驚打唔死班市民,打唔死班後生咁!」


喺婆婆狂數警察不是嘅期間,婆婆嘅屋企人打嚟,佢即刻拎起電話答話自己搭緊車,好大反差嘅舉動引起現場笑聲。

image source蘋果動新聞HK Apple Daily直播截圖


婆婆其實唔係單純指責警員,佢有講話自己對嗰到嘅警員好「唔好意思」,但自己有氣冇地發先過去,又走去同有「3柴」嘅警員講:「你哋死都好,有個浩園畀你哋,有幾百萬,就係你哋唔值得囉!高官嘆冷氣、嘆牛排、嘆紅酒!」矛頭係指向「高官」。

image source蘋果動新聞HK Apple Daily直播截圖


最後婆婆坐低,講咗句:「飲杯啦!得喇!交畀我啦!我搞掂佢!」又再度引嚟現場笑聲。



image source:蘋果動新聞HK Apple Daily直播截圖


網民見到婆婆咁霸氣嘅行為,就梗係好評不斷!好似網民「代表淆底嘅太一」留言話:

「呢啲先係家有一老如有一寶嘅寶 
就算冇接受過咩高上教育單靠人生經驗已經可以看透世事
多謝婆婆出黎爲我地發聲」


銀髮一族身體力行發表自己嘅意見,的確令人敬佩!


延伸閱讀►►►

片/香港社運型YouTuber!大J 轉型想參選區議員

被《時代》選中嘅連登仔!同特朗普齊名,網上最具影響力25個人

片/年輕人嘅守護者葉德嫻!銀髮族遊行誓言唔做廢老



本則時事分析,你覺得?